Kryeministri Edi Rama ka prezantuar së bashku me homologun e Malit të Zi, Dritan Abazoviç projektin e ndërtimit të urës që do të lidhë zonën kufitare mes Ulqinit dhe Velipojës, mbi lumin Bunë.
Gjatë propagandës së radhës, kreu i qeverisë shqiptare e cilësoi ndërtimin e urës si një simbol të bukur të vizionit të bashkëpunimit mes dy vendeve.
“Së pari e mbi të gjitha jemi këtu për të ndarë ju projektin e ndërtimit të urës mbi lumin Bunë në zonën kufitare mes Velipojës dhe Ulqinit. Tashmë ajo do të zhvillohet si projekt i detajuar dhe së bashku do ta ndërtojmë”, tha Rama.
Nga ana e tij, Abazoviç tha se ky projket do të shmangë trafikun pranë Shkodrës në pikën kufitare duke qenë se kamionët kalojnë nga kjo anë.
“Jemi shumë pranë fillimit të punës konkrete. Mali i Zi ka caktuar një pjesë të fondit kushtuar urës. Ndoshta nuk do të përdoret dot këtë vit megjithatë në momentin që përfundojnë projektin e detajuar mund të nënshkruajmë memorandumin. Kjo zonë që prej fillesës së bregdetit në Ulqin mund të jetë një zonë tërheqëse turistike në të ardhmen.
Megjithatë kjo është mënyra si ne mund ta zgjidhim bllokimin e trafikut pranë Shkodrës, në pikën kufitare. Duke qenë se një pjesë e kamionëve do të kalojnë nga kjo anë. Është shumë e thjeshtë dhe shumë irracionale që dikush nuk e ka bërë më parë. Me këtë urë do të kemi shumë efekte pozitive në të dyja anët. Ura dëshmon që nuk jemi vetëm Ballkan i Hapur por jemi në një fazë të re të mënyrës si i kuptojmë marrëdhëniet dy palëshe. 100% keni mbështetjen time. Le të vijojmë menjëherë drejt projektit përfundimtar”-u shpreh Abazoviç.
Kryeministri Rama prezantoi vitin e kaluar projektin që do të lidhë me hekurudhë Podgoricën, Prishtinën dhe Shkupin. Gjatë prezantimit të projektit hekurodhor, i cili sipas kreut të qeverisë shqiptare pritet të lidhë Podgoricën, Prishtinën dhe Shkupin, u shpreh se puna pritet të nisë së shpejti. Sot një vit, nga këto deklarata duket qartë që projekti mbeti në harresë, shkresa dhe deklarata pa asgjë konkrete.
“Jemi tashmë, më së fundmi, duke parë punën të fillojë për hekurudhën Tiranë – Durrës, që ka qenë një proces i gjatë. Aktualisht na duhet që ta lidhim Durrësin me Malin e Zi, në kuptimin hekurudhor, sepse në të kundër, atëherë nuk ka kuptim. Lidhja e Durrësit me Hanin e Hotit dhe nga Hani i Hotit me Malin e Zi do të nxisë tregtinë. Paralelisht me këtë, ne jemi sigurisht të interesuar dhe presim me padurim që të punojmë edhe për hekurudhën tjetër, Durrës – Prishtinë dhe më pas të lidhet me Nishin, që sërish e sjell të gjithë investimin në një rrjet më të gjerë, jo vetëm rajonal, por edhe Evropian.”-deklaroi më herët Rama.
Discussion about this post