Aktivistja e PD-së Evi Kokalari, e cila përgjatë këtyre ditëve është në krah të ish-kryeministrit Sali Berisha, gjatë takimeve që ky i fundit ka bërë me demokratët e bazës në Vlorë dhe Durrës, është takuar sot me presidentin Ilir Meta.
Ka qenë vetë Kokalari që ka ndarë në rrjetet sociale foto me kreun e shtetit, duke shkruar se është e lumtur për këtë takim dhe falenderon Metën për drekën dhe bisedën e sinqertë.
“Jam e lumtur që më në fund takova presidentin Ilir Meta. Faleminderit për drekën e mrekullueshme dhe bisedën tuaj të sinqertë”, shkruan ajo krah fotos.
Gjatë “Foltores” së djeshme të Berishës, Kokalari hodhi akuza të forta ndaj liderit të opozitës Lulzim Basha duke deklaruar se ai e përjashtoi ish-kryeministrin duke e shkëmbyer me mbylljen e dosjes së tij të lobimit në SHBA.
Selia blu reagoi duke e cilësuar si shpifje deklaratën e Kokalarit, ndërsa i kërkoi që të paraqitet në gjykatë për të provuar akuzën, që sipas PD-së është e pavërtetë.
