Brenda pak ditësh kryebashkiaku i Tiranës, Eron Veliaj, ka mbyllur tre tenderë në shkelje të ligjit. Veliaj ose siç Lali Eri pothuajse çdo tender e zhvillon në shkelje të ligjit, në fovor të klientëve të pushtetit. Tenderi i fundit kap vlerat e 300 milionë lekëve dhe është afera e radhës mes bashkisë dhe biznesmenit Albert Metani. Bëhet fjalë për tenderin me numër reference REF-32719-06-13-2022, i cili është porosi për blerje medikamentesh veterinare.
Ky prokurim është klasifikuar me “flamur të kuq” nga Open Data Albania, pasi ka shkelur rregullin për konkurrencën e lirë. Nga dokumentet e publikuara evidentohet se, për këtë tender të mbajtur me datë 29 qershor ka dorëzuar ofertë vetëm kompania “MILIFAR” shpk, në pronësi të Albert Metanit. Me 30 shtator Veliaj ka mbyllur procesin duke e shpallur këtë kompani fituese pa zhvilluar garë të mirëfilltë. I zhvilluar pa garë dhe vlera marramendëse për blerjen e ilaçeve për kafshët, ky tender duhej të ishte nën hetim, por Veliaj për momentin ka fituar “imunitet” nga SPAK-u.
Tenderi për miza
Në fakt, nuk është hera e parë që Metani dhe Veliaj thurin të tilla afera korruptive. Disa, muaj më parë Veliaj dhe pronari i “Milifar” kanë gjetur pretekstin e çuditshëm për “bezdisjen e mizave” ku qarkullojnë miliona lekë nga tenderi. Bëhet fjalë për Drejtorinë e Përgjithshme të Objekteve Publike Tiranë që ka hapur një tender me objekt “Blerje preparate për dezinfektim, dezinfektim dhe deratizim”.
Duke hulumtuar dokumentacionin e tenderit, vihet re se në të kanë marrë pjesë vetëm dy firma, nga të cilat ka fituar për habi firma që ka patur ofertën me vlerë më të lartë. Përkatësisht kanë qenë pjesëmarrës “Albania Distribution Chem” me vlerë të ofruar prej 24,850,000 lekësh të reja pa TVSH dhe “Milifar” me vlerë të ofruar prej 33,561,200 lekësh të reja pa TVSH. Pikërisht kjo e fundit është shpallur fituese ndonëse ka ofruar rreth 87 milionë lekë të vjetra më shumë.
Metani rrëmben 50 milionë lekë për të ushqyer qentë
Ndërsa në fillim të këtij viti, kur Polica e Shtetit drejtohej nga Gledis Nano, i cili gjithashtu ka bashkëpunuar me Albert Metanin i cili është tek afera e radhës, në kohën dhe vendin e duhur. Ky i fundit ka marrë 50 milionë lekë nga Nano për të ushqyer qentë e Policisë së Shtetit për vetëm 2 muaj. Këtë tender Albert Metani e ka fituar përmes kompanisë tjetër të quajtur “Metani”. Kështu, një qen do të ushqehet më mirë se një njeri që përfiton Paketën e Rezistencës së Ramës. Këto kontrata të nënshkruara në shkelje të ligjit tregojnë se Albert Metani është në listën e oligarkëve të privilegjuar.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post