Vëmendja e autoriteteve shëndetësore është përqendruar te frenimi i përhapjes së pandemisë covid-19, por në të njëjtën kohë, sëmundje të tjera po bëhen edhe më kërcënuese për qytetarët dhe mjekët këshillojnë që të mos lihen nën hije këto kategori.
Mjeku Benard Shehu ka thënë sot gjatë një interviste televizive se, zemra, tumoret, diabeti, por dhe sëmundje të tjera të brendshme po marrin shumë jetë njerëzish çdo vit, e madje disafish më shumë se Covid-19. Sipas tij, numri i vizitave nuk ka rënë, madje ka rrezik të shtuar për ata që preken edhe nga Covid-19, ndërsa tregoi më tej se, sëmundjet kardiovaskulare zunë 52,2 për qind të vdekjeve për vitin 2020, duke marrë jetën e mbi 14 mijë e 400 qytetarëve. Ndërsa shtoi se shumë persona kanë filluar të kenë probleme me zemrën pasi kanë kaluar koronavirusin.
“Nuk kemi ulje të vizitave sepse është vetë natyra e sëmundjes që nuk ta lejon neglizhencën. Të prekurit nga Covid kanë çrregullime të ritmit të tensionit, si dhe potencial për infarkte”, thotë mjeku Benard Shehu. Deri më tani, janë raportuar si pozitiv nga koronavirusi mbi 200 mijë persona, nga të cilët pati dhe qytetarë të shëndetshëm që kaluan Covidin, por më pas rezultuan me diabet.
Discussion about this post