Qytetarët shqiptarë kanë frikë të blejnë pasuri të konfiskuara personave të përfshirë në veprimtari kriminale. Kreu i Agjencisë që trajton këto prona deklaroi nga Fieri se janë rreth 90 të tilla për të cilat nuk ka interes, ndaj një pjesë janë vënë në dispozicion të bashkive dhe bizneseve sociale.
Agjencia e Administrimit të Pasurive të Sekuestruara të Konfiskuara, sot ka rreth 90 prona në administrim në të gjithë vendin, nga të cilat siç thotë drejtori Qiriako Theodhori bota e krimit ka hequr dorë, por qytetarët kanë frikë t’i blejnë.
“I kemi nxjerrë ato prona që janë për të shitur, nuk janë shitur sepse në përgjithësi njerëzit tërhiqen karshi pronave” – tha Theodhori.
Në këto kushte, prona të konfiskuara u janë vënë në dispozicion bashkive ose organizatave për projekte sociale, ndërsa fondet e siguruara përdoren për të luftuar krimin e organizuar.
“Jo vetëm bashkisë së Fierit, por kujtdo bashkie çfarë i intereson nga pronat e konfiskuara dhe mund t’i marrin në përdorim, t’i marrin. Bashkisë Lushnje i kemi dhënë 2 prona; një për shkollë dhe një për komisariatin e policisë” – tha më tej Theodhori.
I pranishëm në Fier zëvendës ambasadori italian në Shqipëri, vlerësoi ndryshimet ligjore për trajtimin e pasurive të sekuestruara të krimit të organizuar, ndërsa projekte të tilla i kthejnë borxhin që ata i kanë shoqërisë.
