Në gjetjet e raport-progresit të publikuar dje nga Këshilli Evropian për Shqipërinë, janë “piketuar” si shqetësim patronazhistët, përdorimi i funksioneve publike për fushatë zgjedhore dhe blerja e votës. Edhe Këshilli i Evropës, “pohon” se ekzistenca e databazës së Partisë Socialiste për votuesit që përfshin të dhëna për numrin e identifikimit personal, telefonin, qendrën e punës, është e gabuar.
Në këtë pikë, Këshilli Evropian ka “zënë ngushtë” kryeministrin Edi Rama, i cili në zgjedhjet e 25 prillit ka mbështetur punën e patronazhistëve, që sipas tij janë “heronjtë” e PS-së. Ai ka kundërshtuar këtë kritikë dhe shprehu mosdakordësi.
Ndërkohë Rama u justifikua se ndihet krenar për patronazhistët dhe se sipas tij falë tyre, PS doli forcë e pathyeshme dhe jo një foltore, duke ironizuar edhe ish-kryeministrin Sali Berisha.
“Unë jo jam krenar për patronazhistët, por jam edhe më krenar pasi pa ta nuk do të ishim një forcë e pathyeshme, por do të ishim një foltore. Raporti flet për pretendime që po hetohen. Ne nuk kemi pasur në bazën tonë të të dhënave numrin e kartës pasi nuk na duhen por këto çështje le të hetohen deri në fund nuk ka problem“, tha Rama.
Ekzistenca e databazës së Partisë Socialiste për votuesit potencialë në Qarkun e Tiranës (që përfshin të dhëna për numrin e identifikimit personal, telefonin, qendrën e punës etj.) ka ngjallur debate të shumta për përdorimin e të dhënave personale të individëve nga institucionet zyrtare për llogari të partisë që është aktualisht në pushtet.
