Ardhja e Albin Kurtit në Shqipëri, me rastin e Pavarësisë, tërhoqi vëmendjen e mediave në vend. Fakt është se Kryeministri Rama nuk pati një takim zyrtar me Albin Kurtin, por vetëm një shtrëngim duarsh, duke reflektuar edhe një herë ‘ftohjen’ që ekziston midis tyre.
Gjatë ecjes në monumentin e Pavarësisë në qytetin e Vlorës, Rama dhe Kurti ecën të ndarë, në mes tyre ecnin kryetarja e Kuvendit, Lindita Nikolla dhe Presidenti i Republikës, Bajram Begaj.
Gjatë fjalës së tij, para mediave, Kurti tha se nuk ishte dita sot për të debatuar për dallimet politike.
“Ishte kënaqësi që të ndjekim ekspozitën e kuruar me shumë kujdes dhe pasion nga Evi Pojani me piktorë vlonjatë pastaj të shohim edhe përmbledhjen filatelike, ndërsa në hyrje janë edhe dokumente historike të komunitetit Mbrojtja Kombëtare e Kosovës. Gëzuar gjithë shqiptarëve 28 Nëntorin, këtë festë të madhe të flamurit. Për të gjithë shqiptarët kudo që janë në Ballkan. Lavdi Dëshmorëve të Kombit! Nuk është sot dita që të flasim për dallimet politike, për polemikat aktuale sot jemi bashkë, shqiptarët e kanë të përbashkët historinë dhe ardhmërinë. Kemi shumë ditë të tjera gjatë vitit për këto tema”, tha Kurti.
Pjesë e ceremonisë në Vlorë ishte edhe Sali Berisha. Ai mbërriti më vonë në një ceremoni veçmas me pak njerëz të strukturave partiake të Vlorës.
Berisha tha se nuk kishte ftesë për ceremoninë shtetërore. Ai zhvilloi homazhe pranë varrit të Ismail Qemalit.
Lulzim Basha uroi nga Facebook shqiptarët për ditën e ngritjes së Flamurit.
Vetë ai nuk ishte në Tiranë, por në Kosovë, në Mitrovicë.
“Në ditën e pavarësisë, Kryetari i PD, Lulzim Basha, sëbashku me deputetë dhe anëtarë të kryesisë së PD, do të bëjë homazhe në Boletin, në kullën e Isa Boletinit. Për të nderuar ne këtë 111 vjetor të pavarësie kontributin vendimtar të Isa Boletinit dhe luftëtarëve të Kosovës për pavarësinë e Shqipërisë, në mbështetje të Ismail Qemalit dhe qeverisë së parë të shtetit të pavarur shqiptar”, thuhet në njoftimin e PD-së zyrtare.
Discussion about this post