Deputeti i sapozgjedhur i Partisë Demokratike, Blendi Himçi, ka ngritur akuza serioze ndaj Policisë së Shtetit, duke e akuzuar për manipulim të provave dhe mbulim të fakteve kyçe që lidhen me parregullsitë në procesin zgjedhor të 11 majit. Në një deklaratë për mediat, Himçi shprehet se struktura shtetërore po bashkëpunon me qeverinë për të mbuluar atë që ai e cilëson si “farsë elektorale”.
Deklarata e Himçit vjen pas një njoftimi zyrtar të Policisë së Elbasanit në lidhje me një ndërhyrje në një lokal në fshatin Pekisht të Peqinit, ku u sekuestruan materiale të cilësuara si të falsifikuara zgjedhore. Sipas Himçit, policia ka fshehur elementë të tjerë thelbësorë nga vendngjarja, përfshirë kartat e identitetit që, sipas tij, janë fotografuar nga vetë efektivët në tavolinën e lokalit.
Ndërkohë që policia përmend 280 mijë lekë si shumë të sekuestruar në vendngjarje, deputeti demokrat thekson se shuma reale përfshin edhe euro dhe paund britanikë, të cilat, sipas tij, janë të dukshme në fotot që shoqëronin komunikatën fillestare të Policisë së Shtetit. Ai shton se këto para ishin destinuar për blerjen e votave dhe se janë fshehur në mënyrë të qëllimshme duke u vendosur në portofolin e një patronazhisti të PS-së.
Një tjetër element i rëndësishëm që, sipas Himçit, është anashkaluar nga autoritetet, është pamundësia për të verifikuar lëvizjet dhe transaksionet e ndodhura në lokal, përmes sekuestrimit të pamjeve filmike të kamerave të sigurisë. “Në ato pamje shihet qartë kush ka hyrë, kush ka dalë dhe ku ndodheshin paratë në momentin e ndërhyrjes”, tha ai.
Deputeti Himçi akuzon Policinë për minim të qëllimshëm të hetimit, duke kërkuar që vetëm një individ të dënohet për falsifikim materialesh zgjedhore, ndërkohë që pjesa tjetër e akuzave si blerja e votave dhe shtrëngimi për ndryshim të vullnetit zgjedhor të shpërfillen.
Në fund të deklaratës, ai i bën thirrje SPAK-ut të mos fokusohet te “shfaqje publicitare” apo ndjekje selektive, por të përqendrohet tek, siç e quan ai, “problemi i vërtetë i zgjedhjeve” dhe lidhjet e mundshme kriminale brenda strukturave shtetërore dhe vendimmarrëse.
Discussion about this post