Sikurse në Komisionet e tjera, dhe ai i ligjeve u shoqërua me debate mes ministres së Shëndetësisë Ogerta Manastirliu dhe deputetëve të opozitës lidhur me procesin e vaksinimit.
Deputeti demokrat Dashnor Sula ngriti shqetësimin se sipas tij, në qendrat e vaksinimit në Shqipëri janë paguar shuma deri në 200 apo 300 euro për të marrë certifikatën e vaksinimit false, pa i kryer dozat e vaksinës.
“A keni informacion dhe raste të caktuara që në qendrat e vaksinimit ndodh që nuk kryhet vaksinimi real por bëhet fallco dhe paguhet 200-300 euro për një vaksinim fallco që marrin certifikatën e vaksinimit? Se është fakt, shumë persona që kanë dalë jashtë shtetit, janë verifikuar që kanë qenë vaksina false të realizuara në qendrat e vaksinimit të shtetit shqiptar, kjo indicie vjen edhe nga aeroporti i Rinasit”, tha deputeti Sula.
Pas raportimit të ministres, deputeti hodhi akuzën se Manastirliu nuk i ishte përgjigjur kësaj pyetjeje që Sula shtroi në komision.
“Unë e sqarova që përmes e-Albania kemi ndërtuar një sistem që çdo qytetar që bën vaksinën ai pajiset me kodin e vaksinës, e ky është gjurma që vendoset në sistemin që quhet e-Albania e hidhet në kohë reale që çdo qytetari ti dalë certifikata e vaksinimit. Nëse nuk e besoni shkoni në një pikë vaksinimi të shihni si hidhen të dhënat. Nëse ju mendoni keni parë apo keni qenë pjesë e keni konstatuar që ka vaksina që bëhen të rreme e unë nuk mund ta them këtë, denoncojeni pranë organeve kompetente. Sa i përket denoncimeve të medias, i falënderoj se të gjithë jemi aleat me median apo me këdo që denoncon diçka nuk shkon për ta përmirësuar apo për ti dhënë dënimin përkatës atij kush ka guxuar të veprojë ndryshe”, u shpreh Manastiliu.
Ndërkohë në këtë moment deputeti i opozitës Gazment Bardhi kërkoi fjalën dhe pati dhe një replikë me kryetaren e komisionit Klotikda Bushka.
“Ju nuk keni asnjë të drejtë të më paragjykoni çfarë do them unë është e padëgjuar që më paragjykon çfarë do them, kam kërkuar fjalën ngrita dorën mora fjalën bëra një pyetje që s’kam marrë përgjigje dhe nuk e caktoni ju e mora apo jo përgjigjen. Shqipëria është e fundit në rajon për mbulesën vaksinale, pse Shqipëria është pas Kosovës? Kërkoj përgjigje konkrete jo propagandë, meqë e paske shqetësim ti se përmendim fjalën propagandë”, replikoi Bardhi.
Nga ana tjetër, Bylykbashi tha se qeveria nuk ka dhënë informacione se kush është targeti i vaksinimit dhe sa shpejt do arrihet.
