Partia Demokratike e Shqipërisë ka reaguar zyrtarisht në mbështetje të luftës çlirimtare të Ushtrisë Çlirimtare të Kosovës (UÇK), duke e cilësuar atë si “faqen më të ndritur të historisë shqiptare që nga koha e Skënderbeut”. Në një deklaratë të publikuar sot, PD ka renditur qartësisht qëndrimet e saj lidhur me luftën, procesin në Gjykatën Speciale në Hagë dhe protestën e zhvilluar në mbështetje të ish-drejtuesve të UÇK-së.
Deklarata thekson se pa sakrificën e UÇK-së, Kosova nuk do të ishte as e lirë dhe as e pavarur, ndërsa e cilëson këtë luftë si të vetmen çlirimtare në Europë në dekadat e fundit që i dha fund pushtimit serb.
“Ushtria Çlirimtare e Kosovës ishte aleate besnike e NATO-s gjatë fushatës ajrore kundër regjimit të Millosheviçit në pranverën e vitit 1999. Kjo është një e vërtetë historike e pamohueshme,” thuhet në deklaratë.
Partia Demokratike shprehet se ndjek me vëmendje të lartë procesin në Gjykatën Speciale dhe thekson se nuk janë paraqitur fakte apo prova që të mbështesin akuzat ndaj Hashim Thaçit, Rexhep Selimit, Jakup Krasniqit apo të tjerëve. Sipas PD-së, “janë rrëzuar akuza monstruoze si ajo e ‘shkuljes së organeve’, të fabrikuara nga Beogradi dhe qarqe antishqiptare.”
Në fund, PD bën thirrje që gjykata në Hagë të shpallë pafajësinë e udhëheqësve të UÇK-së dhe të respektojë parimet ndërkombëtare të drejtësisë. Ajo gjithashtu përshëndet protestën paqësore të zhvilluar në mbështetje të tyre, ndërsa denoncon përpjekjet për manipulimin e saj “nga albanofobë shqipfolës”.
“Një komb, një qëndrim – liri për çlirimtarët!”, përmbyllet deklarata e PD-së.
Partia Demokratike përsëri deklaron se:
1. Lufta çlirimtare e UÇK-së në Kosovë është faqja më e ndritur e luftërave të shqiptarëve për liri dhe dinjitet kombëtar që nga luftërat e Skënderbeut.
2. Pa sakrificën, gjakun, trimërinë dhe heroizmin e luftëtarëve të lirisë të UÇK-së, Kosova nuk do të ishte kurrë një vend i lirë dhe i pavarur.
3. Lufta e UÇK-së për çlirimin e Kosovës është lufta e fundit çlirimtare në Europë që i dha fund pushtimit të gjatë serb të Kosovës, dhe Ushtria Çlirimtare e Kosovës ishte aleate besnike e Aleancës së Atlantikut të Veriut në territorin e Kosovës gjatë fushatës së bombardimeve ajrore kundër regjimit të Millosheviçit nga Aleanca, në pranverën e vitit 1999.
Partia Demokratike e Shqipërisë është forca politike që mbështet zbatimin e ligjit kombëtar dhe ndërkombëtar. Kjo parti ka mbështetur krijimin e Gjykatës Speciale të Kosovës me seli në Hagë dhe ka ndjekur e ndjek me vëmendjen më të madhe punimet e kësaj gjykate në procesin gjyqësor kundër ish-udhëheqësve politikë të UÇK-së dhe të Republikës së Kosovës: Hashim Thaçi, Jakup Krasniqi, Fatmir Limaj, Rexhep Selimi, etj.
Partia Demokratike konstaton se në këtë proces të zgjatur, disa herë para publikut nuk është paraqitur asnjë fakt apo provë për asnjërën prej akuzave të paraqitura ndaj tyre. E kundërta, janë rrëzuar akuzat monstruoze si ajo e “shkuljes së organeve” dhe tregtimit të tyre nga luftëtarët e UÇK-së në zona të ndryshme të Shqipërisë.
Nuk është publikuar asnjë fakt apo provë që të provojë urdhra direkt të ish-udhëheqësve të UÇK-së për krime konkrete. Ky proces dëshmoi përfundimisht se ai është i bazuar në dosje të fabrikuara nga Beogradi dhe armiq të tjerë të kombit shqiptar që kërkojnë të barazojnë agresorin, pushtuesin me çlirimtarin.
Për të gjitha këto, Partia Demokratike i bën thirrje trupit gjykues të Gjykatës Speciale të Kosovës në Hagë të shpallë sa më parë pafajësinë e ish-udhëheqësve politikë të UÇK-së dhe të Kosovës, në respekt të plotë të parimeve ndërkombëtare të drejtësisë.
Së fundmi, Partia Demokratike përshëndet protestën paqësore të bashkëluftëtarëve të ish-udhëheqësve të UÇK-së dhe të Kosovës, sikundër dënon çdo përpjekje për manipulim të saj nga albanofobë shqipfolës, armiq të damkosur të Kosovës.
Discussion about this post