Partia Demokratike ka depozituar një kallëzim në Prokurorinë e Posaçme (SPAK) për deputetin e Partisë Socialiste në Qarkun e Vlorës, Anduel Tahiraj, i cili ka qenë dhe kryetar i degës së PS-së në qytetin bregdetar.
Kallëzimi në SPAK ndaj Tahirajt është referuar për kryerjen e veprave penale: fshehje dhe deklarim të rremë të pasurisë, fshehje të të ardhurave, ushtrim të aktivitetit tregtar të paregjistruar, si dhe shpërdorim detyre.
Padia në SPAK ndaj deputetit socialist të Vlorës është bazuar në emisionin “Piranjat”, ku u denoncua se Tahiraj ishte pronar i hotelit “Bee Hotel” që e ushtron aktivitetin e tij që nga viti 2023. Por, sipas denoncimit, për më shumë se një vit, hoteli ka punuar i paregjistruar, si në Qendrën Kombëtare të Biznesit ashtu edhe në Drejtorinë Vendore të të Ardhurave Vlorë për të shmangur detyrimet dhe duke shkaktuar evazion fiskal në dëm të shtetit. Ky biznes, ushtron aktivitet me NIPT-in, që rezulton në emër të vëllait të deputetit, i cili që nga viti 2017 e deri para pak kohësh ka pasur si fushë veprimtarie “Farmaci dhe Klinikë veterinare”.
PD i kërkon SPAK që të bëjë detyrën që i kërkon ligji dhe t’i trajtojë të gjithë deputetët si të barabartë.
Depozitimin e kallëzimit në Prokurorinë e Posaçme e konfirmoi ish-deputeti demokrat Klevis Balliu.
“Partia Demokratike, mbështetur mbi një investigim të emisionit “Piranjat”, ka denoncuar publikisht deputetin e Partisë së Edi Ramës, Anduel Tahiraj për fshehje dhe deklarim të rremë të pasurisë dhe fshehje të të ardhurave, ushtrim të aktivitetit tregtar të paregjistruar, si dhe shpërdorim detyre. Kur sheh listën e larmishme me shkelje, profili shoqëror që të vjen në mendje nuk është i një deputeti, por i një kundravajtësi recidivist. Por nuk duhet të habitemi, Rama kështu i preferon deputetët, sa më antiligjorë, sa më kriminelë duke filluar nga tipologjia Tahiraj e deri te tipat si Çyrbja. Nëpërmjet deputetëve të opozitës investigimi për deputetin e Ramës është konkretizuar në një kallëzim penal në SPAK, të cilit i kërkojmë të bëjë detyrën që i kërkon ligji. Sidomos t’i trajtojë si të barabartë të gjithë deputetë, jo të arrestojë dhe të burogosë pa prova ata të opozitës dhe të lërë të lirë me një mal provash ata të qeverisë”, tha Balliu nga selia blu.
“Partia Demokratike ka denoncuar gjatë këtyre viteve afera të pafundme korruptive të cilat janë arsyeja themelore e varfërimit tuaj dhe familjes tuaj. Këto vjedhje bëhen të mundura nga kapja e drejtësisë nga Rama, që garanton mbrojtjen e parave të zhvatura nga pushtetarët hajdutë. Për njerëzit e partisë ka arrestime sa për show ndërsa për kundërshtarët politikë të qeverisë burgosje pa prova dhe arrestime që i bëjnë të duken si rrëmbime për të trembur njerëzit. Edi Rama mund të shfajësohet për hajdutët që mbledh rreth vetes, duke pretenduar se nuk e di kur i hanë kumbulla pas shpine, por një pyetje mbetet pa përgjigje. Si ka mundësi që ky zotëria shkon e gjen vetëm ata që vjedhin e vrasin? E ndjekin ata këtë apo i gjen ky vetë, se të tillë i duhen dhe të tillë i pëlqejnë”, shtoi ai.
Discussion about this post