Partia Demokratike ka akuzuar kryeministrin Edi Rama se po përdor fondet e rindërtimit dhe punësimet në administratë për të blerë votat e zgjedhjeve të pjesshme lokale të 6 marsit.
Në një deklaratë nga selia blu, këshilltari ligjor i PD, Marash Logu, theksoi se edhe në zgjedhjet e pjesshme Rama ka vënë në jetë të njëjtën skemë të masakrës zgjedhore të 25 prillit
“Ujku qimen e ndërron por zakonin se harron thotë populli. Kështu është dhe Edi Rama. Edhe në këto zgjedhje të pjesshme ka vënë në jetë të njëjtën skemë të masakrës zgjedhore të 25 prillit. Fonde për rindërtim dhe punësime të përkohshme në këmbim të votës në Durrës dhe Rrogozhinë është skema e vënë sërish në jetë nga Edi Rama. Në zgjedhjet e 25 Prillit 2021, Partia Demokratike ka denoncuar me fakte dhe dokumente konkrete, shpërndarjen e mbi 125 milionë euro pagesa për tërmetin në këmbim të votës. Vetëm në bashkinë Durrës, një javë përpara zgjedhjeve, u shpërndanë 6 milionë euro pagesa për tërmetin me qëllim manipulimin e vullnetit të qytetarëve Partia Demokratike ka denoncuar publikisht dhe kallëzuar penalisht në prokurori punësimin e mbi 13 mijë punonjësve në administratë publike për qëllime elektorale”, u shpreh Logu.
Sipas Logut, PD ka denoncuar në KQZ shpërndarjen e paligjshme dhe selektive të fondeve të rindërtimit nga Bashkia Durrës për 526 familje, ndërsa ka denoncuar dhe punësimin me kontrata 3-mujore të 29 punonjësve nga Bashkia Rrogozhinë. Ai shton se për Partinë Demokratike, ka qenë dhe mbetet e qartë se Edi Rama dhe mazhoranca e tij janë armiq të betuar të zgjedhjeve të lira dhe të ndershme.
Discussion about this post