Deputetja e Partisë Demokratike, Sorina Koti, në një deklaratë për mediat ka akuzuar qeverinë se me pretekstin e krizës, Edi Rama shpalli planin e tij për të marrë 200 milionë euro borxh që OSHEE dhe KESH të vazhdojnë të bëjnë tendera dhe të shpërdorojnë paratë e qytetarëve.
Sipas saj, ky borxh i ri do të ndikojë edhe në rritjen e çmimeve të produkteve të tjera dhe deklarata e djeshme e kryeministrit kishte qëllim që të hiqte përgjegjësinë nga vetja dhe nga qeveria.
“Me pretekstin e krizës, ditën e djeshme Edi Rama shpalli planin e tij për të marrë 200 milionë euro borxh që OSHEE dhe KESH të vazhdojnë të bëjnë tendera dhe të shpërdorojnë paratë e qytetarëve, siç kanë bërë vitet e fundit e vecanërisht në pranverë e në verë. Ky borxh i ri, i shoqëruar nga gropat që kjo qeveri ka hapur në financat publike, do të shoqërohet edhe me rritje të përgjithshme të çmimeve të produkteve. E për pasojë papërgjegjshmërinë e pushtetit, do ta paguajnë familjet shqiptare.
Prandaj fjalimi i djeshëm kishte për funksion që Edi Rama të hiqte përgjegjësitë nga vetja dhe kabineti i tij.” – tha Koti.
Më tej deputetja e PD shpjegoi mënyrën skemën se si po vidhet me krizën të shpikur nga qeveria.
“Por ja si keqmenaxhohet energjia elektrike; ja si vidhen shqiptarët: KESH deri në Shtator 2021 ka prodhuar 4.5 Mld KWh. Nëpërmjet OSHEE qytetarët janë furnizuar me 3.2 Mld KWh. Pjesa tjetër e prodhuar nga KESH, 1.3 Mld kWh është shitur (eksportuar)
Ndërkohë konsumi familjar + biznes ne Shqipëri deri në Shtator 2021 ka qenë 4.6 Mld KWh. Por qeveria, nuk i ka furnizuar konsumatorët me prodhimin e brendshëm të KESH, por duke importuar energji. Çmimi i shitjes nga KESH tek OSHEE për konsumatorin është 12 €/ MWh, ndërsa çmimi i importit është 260 € MWh” – tha deputetja e PD, Sorina Koti.
Ajo më tej shton se gënjeshtrat e Kryeministrit dalin hapur, pasi Shqipëria i plotëson nevojat e konsumit të energjisë me prodhimin e brendshëm nga KESH.
“Ja pra, që gënjeshtrat e Kryeministrit dalin hapur. Me mirëmenaxhim dhe përgjegjshmëri, ne i plotësojmë nevojat e konsumit të energjisë me prodhimin tonë të brendshëm nga KESH. Me çmimin e KESH, (për 4 muajt e ardhshëm Shtator-Dhjetor) nga Buxheti i Shtetit do shpenzoheshin 8 Mln €; Ndërsa me skemën e vjedhjes (nëpërmjet energjisë së importuar) nga Buxheti i Shtetit do harxhohen 150 Mln €. Pikërisht, për këtë arsye, ne themi që është krizë e manaxhimit të fondeve, e burimeve natyrore, krizë nga korrupsioni dhe absolutisht jo, krizë e energjisë elektrike” – u shpreh Koti.
Për të gjitha këto shpërdorime me paratë e qytetarëve, Partia Demokratike është shprehur se do të dorëzojë kallzime penale në SPAK.
