Partia Demokratike, nëpërmjet deputetit Lefter Gështenja ka denoncuar se qeveria do të paguajë 926 mijë euro për të paguar siguracione udhëtimi për punonjësit e Ministrisë së Jashtme deri në fund të këtij viti.
Në një postim në rrjetet sociale, Gështenja vë në dukje se kjo “procedurë luksi” po bëhet në një kohë kur nevoja për para për të përballuar krizën është e madhe.
Deputeti demokrat shpjegon se qeveria do harxhojë 2800 euro për çdo diplomat shqiptar dhe familjarët e tyre për “udhëtime imagjinare”. Sipas dokumenteve të tenderit, që Gështenja i ka publikuar në Facebook, ky siguracion do vlejë për 335 persona, diplomatët dhe familjarët e tyre.
“Kriza ekonomike po gërryen familjet shqiptare por për qeveritarët është krejt ndryshe. Si asnjëherë më parë, qeveria do shpenzojë 926 mijë euro vetëm për të paguar siguracione udhëtimi për punonjësit e ministrisë së Jashtme deri në fund të këtij viti. Kjo procedurë luksi bëhet në një kohë kur nevoja për ato para është kaq e madhe për të mbuluar gropat e krizës. Por për qeverinë Rama dhe ministren Xhaçka, harxhimi i këtyre para vlen më shumë se familjet në nevojë. Me pak fjalë, qeveria do harxhojë 2800 euro për çdo diplomat shqiptar dhe familjarët e tyre për udhëtime imagjinare. Sipas dokumenteve të tenderit, ky siguracion do vlejë për 335 persona, diplomatët dhe familjarët e tyre. Vlera e këtij tenderi është edhe më e madhe se kostoja e vetë udhëtimit të diplomatëve shqiptare. Në këto kohe krize, udhëtimet janë kufizuar nga të gjitha vendet por për Ramën kjo nuk përbën asnjë shqetësim për të vjedhur e shpërdoruar paratë publike. Anulimi i këtij tenderi dhe shumë të tjerëve është kusht për të administruar krizën ekonomike”, shkruan Gështenja.
Discussion about this post