Partia Demokratike ka denoncuar nismën e Kryeministrit Edi Rama për krijimin e një “ministre virtuale” të quajtur Diella, e cila do të mbikëqyrë tenderat publikë. Zëdhënësja e Antikorrupsionit në PD, Genta Vangjeli, e cilësoi këtë nismë si një “mekanizëm informal dhe antikushtetues” që synon të përqendrojë pushtetin absolutisht në duart e Kryeministrit.
Sipas Genta Vangjelit, ky koncept i ri u shpik si pasojë e refuzimit të vazhdueshëm të nëpunësve të administratës publike për të zbatuar urdhra të paligjshëm në procesin e prokurimeve. Në njëdeklaratë nga selia blu këtë të shtunë ajo argumentoi se, pavarësisht pretendimeve të Ramës për transparencë dhe pakorruptueshmëri, “ministrja virtuale” ngre shqetësime serioze ligjore dhe kushtetuese:
- Mungesë e bazës ligjore: Koncepti i një “ministri virtual” nuk ekziston në Kushtetutë apo në ligjet shqiptare. Emërimi dhe shkarkimi i ministrave rregullohet qartë me ligj dhe nuk mund të zëvendësohet me një entitet të paidentifikuar ligjërisht.
- Mungesë llogaridhënieje: Për shkak të natyrës së saj virtuale, mungon çdo formë e përgjegjësisë ligjore apo institucionale. Vangjeli ngriti pyetjen se kush do të mbajë përgjegjësi në rast shkeljesh ligjore apo dëmi ndaj financave publike.
- Përqendrim i pushtetit: Zëdhënësja e PD-së theksoi se ligji për prokurimin publik përcakton ndarjen e roleve për të shmangur përqendrimin e pushtetit. Mirëpo, sipas saj, Rama ka përqendruar në një dorë të vetme të gjitha funksionet e sistemit të prokurimit, duke e bërë Diellën një “zgjatim të vetë Kryeministrit”.
Në fund, Genta Vangjeli e cilësoi këtë mekanizëm si një hap pas, i cili nuk garanton transparencë, por i hap rrugën abuzimit dhe vjedhjes së pasurisë publike pa llogaridhënie.
Discussion about this post