PD ka dorëzuar paraditen e sotme ka depozituar pranë Kuvendit kërkesën për ngritjen e një Komisioni Hetimor për çështjen e inceneratorëve. Ka qenë nënkryetarja e partisë, njëkohësisht deputetja e PD, Jorida Tabaku, ajo që ka depozituar kërkesën pranë Kuvendit, teksa tha para mediave se ky komision do të bëjë verifikimin e ligjshmërisë së të gjitha hapave që janë marrë për inceneratorët e Tiranës, Fierit dhe Elbasanit.
Sipas Tabakut, qeveria i ka dhënë një projekt korruptiv një kompanie që nuk ka asnjë lidhje me mbetjet, dhe se me 17 vendime brenda ditës është dhënë inceneratori i Elbasanit.
“Të gjithë e keni ndjekur çështjen e inceneratorëve. Të gjithë keni dëgjuar interpelancën që PD ka bërë, që qeveria në shkele të ligjit, në shkelje të Kushtetutës ka dhënë një projekt korruptiv, një kompanie pa asnjë lidhje me fushën e menaxhimit të mbetjeve. Ka dhënë për 10 vite në njërin qytet, për 30 vite në qytetin e Tiranës projektin e inceneratorëve, duke shkelur të gjitha ligjet dhe rregullat, duke shkelur ligjin e konkurrencës nga njëra anë por nga ana tjetër, duke vendosur të gjithë qeverinë në shërbim të një biznesi të vetëm. Me 17 vendime brenda ditës është dhënë inceneratori i Elbasanit, ku ka pasur një shkelje të jashtëzakonshme të të gjithë procedurave, vetëm e vetëm për t’i dhënë këtij biznesi, këtij individi, Klodian Mërtiri të lidhur me qeverinë, të lidhur me anëtarët e qeverisë një kontratë konçesionare“.
Tabaku tha se KLSH ka gjetur shkelje në inceneratorin e Tiranës, ku një kontratë e nënshkruar për 120 milionë uro, në fund të ditës po paguhet mbi 300 milionë euro nga paratë e taksapaguesve shqiptarë
“Kontrolli i Lartë i Shtetit ka gjetur një shkelje të jashtëzakonshme sidomos me inceneratorin e Tiranës, një kontratë e nënshkruar për 120 milionë uro që në fund të ditës po paguan mbi 300 milionë euro nga paratë e taksapaguesve shqiptarë. Për të mos mjaftuar kjo, tarifat e pastrimit janë rritur, në qytete si Tirana, Durrësi, Elbasani dhe do të vazhdojnë me qytete të tjera. Me pak fjalë i gjithë shteti është ngritur në këmbë për këtë kontratë korruptive, për këtë kontratë konçesionare. Ndërkohë që flasim, nuk ka akoma asnjë të hetuar përpara drejtësisë“, tha Tabaku.
Anëtarët përbërës të Komisionit do të jenë Luçiano Boçi, Belind Këlliçi, Helidon Bushati, Lefter Gështenja, Edmond Spahi dhe Dhurata Çupi, ndërsa Tabaku do të mbajë pozicionin e kryetares.
Ditën e djeshme, PD depozitoi kërkesën për ngritjen e një Komisioni hetimor për zgjedhjet e 25 prillit, ndërsa pritet gjithashtu dhe ngritja e një Komisioni për çështjen Beccheti.
