Partia Demokratike depozitoi sot kërkesën zyrtare në Këshillin për Legjislacionin, ku kërkon shkarkimin e Kryetarit të Kuvendit, Niko Peleshi me pretendimin se ka shkelur rëndë Kushtetutën dhe rregulloren e këtij institucioni.
Sipas PD-së, Peleshi ka thirrur dhe drejtuar dy seanca plenare (datë 16 shtator dhe 18 shtator), në të cilat “ka kryer veprime aktive në kundërshtim të hapur me Kushtetutën dhe Rregulloren e Kuvendit, si dhe ka mohuar të drejtat e deputetëve të opozitës, duke treguar hapur njëanshmëri politike në drejtimin e organit më të rëndësishëm kushtetutës, Kuvendit të Shqipërisë”.
PD gjithashtu ka renditur edhe 11 shkeljet e kryera nga Peleshi që, sipas saj, “vetëm në pak kohë asgjësoi parlamentin”.
Sipas PD-së “Kryetari i Kuvendit, me veprimet dhe mosveprimet e tij, në këtë periudhë të shkurtër të drejtimit të Kuvendit të Shqipërisë, ka dëshmuar mungesë të plotë të angazhimit për të ushtruar funksionin në përputhje me Kushtetutën dhe Rregulloren e Kuvendi, si dhe duke u sjellë si një vartës i Kryeministrit, i cili mori de facto edhe drejtimin e seancës së datës 18.09.2025, herë duke urdhëruar kush do fliste, herë duke urdhëruar kush deputet do të fliste për procedurë dhe herë duke urdhëruar Kryetarin e Kuvendit për procedurën që duhet të ndiqte”.
“Kështu, Kryetari i Kuvendit, Niko Peleshi, ka vepruar në shkelje të rëndë të Kushtetutës dhe Rregullores së Kuvendit, duke përdhosur parlamentarizmin dhe minuar funksionimin demokratik të Kuvendit”, theksohet në kërkesën e PD-së.
Në këto kushte, sipas PD-së Këshilli për Legjislacionin duhet të fillojë menjëherë procedurën për shkarkimin e saj nga detyra.
Discussion about this post