Partia Demokratike dhe Lëvizja Socialiste për Integrim janë dakordësuar për mbajtjen e një tryeze të forcave politike mbi situatën e krijuar pas publikimit të përgjimeve italiane mbi trafikun e drogës, ku implikohet direkt ish-ministri i Brendshëm Saimir Tahiri. Në dy dalje të veçanta për mediat, Basha dhe Kryemadhi e kanë drejtuar gishtin e përgjegjësisë nga kryeministri i vendit Edi Rama.
Pak orë pas publikimit në media të dosjes italiane ndaj Moisi Habilajt dhe grupit, ku përmendej edhe emri i ish-ministrit të Brendshëm, Saimir Tahiri reagoi edhe kreu i Opozitës, Lulëzim Basha. Sipas tij, faktet tronditëse provuan se si janë blerë zgjedhjet me paratë e krimit. Ai paralajmëroi se në ditët në vijim do të dalin në dritë fakte tronditëse për ministra të përfshirë në trafikun e drogës.
Për këtë arsye Basha njoftoi thirrjen e një tryeze me të gjithë faktorët politikë.
Pak minuta më vonë, në një dalje për mediat kryetarja e LSI Monika kryemadhi, njëlloj si Lulzim Basha tha se Tahiri është lidhja e krimit me kryeministrin Rama.
Kryemadhi iu përgjigj pozitivisht ftesës së Bashës për tryezë dhe tha se është momenti për të krijuar një front të përbashkët kundër krimit me pushtet.
Të njëjtën mbrëmje Kryemadhi e shoqëruar nga kreu i grupit parlamentar të LSI Petrit Vasili i janë drejtuar selisë blu për një takim me Lulzim Bashën. Nuk pati deklarata pas takimit, por u konfirmua se ishte rënë dakord që tryeza e partive politike të mbahet të mërkurën në orën 11 tek hotel Tirana.
https://youtu.be/a9f6Q43rwBI
