Pas leximit të vendimit të Kushtetueses, Sekretari i Përgjithshëm Gazment Bardhi konfirmon për herë të parë se demokratët janë gati për zgjedhje të parakohshme lokale në 6 bashki. Partia Demokratike bën fajtor Ilir Metën për betejën e humbur në Gjykatë për vendoret e vitit 2019.
“Gjykata Kushtetuese nuk ka legjitimuar 30 qershorin thjesht ka legjitimuar qe Shoqata e Bashkive nuk ka tager ta vinte dot në lëvizje gjykatën, do duhet ta vinte në lëvizje Presidenti i Republikës. Ju siguroj se në çdo moment që do ketë zgjedhje PD ka burime për të pasur kandidat për çdo zonë” – tha Bardhi.
Por edhe pse shpreh gatishmërinë për zgjedhjet Bashkiake, Partia Demokratike ka shanse të përballet me zgjedhje partiake pasi Sali Berisha ka nisur shpërndarjen e kartave me simbolet e partisë për Kuvendin e 11 Dhjetorit.
“Do ndjekim rrugën ligjore për personat që kanë prodhuar dokumente me vulën dhe simbolin e PD në mënyrë të pautorizuar” – tha Bardhi.
NË çdo foltore që ka zhvilluar, Sali Berisha ka shtuar dozën e akuzave ndaj paraardhësit të tij. Më e fundit dosja e “Toyota Yaris” ku pretendohet se Lulzim Basha po hetohet në Belgjikë.
“Basha i pari që ka folur për këtë çështje, nuk mundet që personi që denoncon të jetë i pandehur. E çuditshme u njoftoka Berisha nga prokurorët belg dhe jo Basha” – tha Bardhi.
Sekretari i Partisë Demokratike këmbëngul se në 11 Dhjetor do mbahet miting ndërsa pohon se për Kuvendin e thirrur nga Lulzim Basha kanë konfirmuar pjesëmarrjen më shumë se 5 mijë delegatë.
“Dua t’ju siguroj që sipas informacioneve të përcjella nga secila degë e Partisë Demokratike, numri i anëtarëve pjesëmarrës në Kuvendin Kombëtar të datës 18 do të jetë më shumë se pjesëmarrja në Kuvendin e fundit të Kuvendit Kombëtar të PD-së, atë të datës 17 Korrik” – tha Bardhi.
Discussion about this post