Ish-kryetari i Partisë Demokratike në Durrës, Luan Hoti, ka reaguar ashpër pas rezultateve të zgjedhjeve parlamentare të vitit 2025, duke i cilësuar ato si “zgjedhjet më të dobëta të organizuara ndonjëherë në Shqipëri”.
Në një deklaratë të gjatë drejtuar demokratëve, Hoti akuzon se makineria shtetërore, patronazhistët dhe blerja e votës kanë funksionuar në mënyrë perfekte, por thekson se përgjegjësia për humbjen bie edhe mbi vetë Partinë Demokratike.
“Kush ka menduar se kjo gjë nuk do të ndodhte, ose nuk kupton nga politika, ose është dashakeq ndaj PD-së. Megjithatë, unë mendoj se shkaqet e kësaj humbjeje nuk lidhen vetëm me metodat e kundërshtarit, por edhe me tonat,” – shkruan Hoti.
Sipas tij, humbja e thellë me diferencë prej 21 mijë votash duhet të shërbejë si alarm për një analizë të thellë dhe të ndershme brenda partisë, duke filluar nga strukturat bazë deri në drejtimin qendror.
“Duhet të pranojmë gabimet tona. Vetëm kështu do të ringrihemi më shpejt, jo duke i fshehur siç kemi bërë për vite me radhë,” – thekson ish-kreu demokrat i Durrësit.
Hoti shpreh kritika të forta për mënyrën se si u organizuan primaret dhe për strukturën aktuale drejtuese të partisë, duke e cilësuar procesin si formal dhe të manipuluar.
“Si mund t’i fitonim zgjedhjet me kryetarë degësh të komanduar, me primare të organizuara dy ditë para dorëzimit të listave në KQZ, apo me ndarje degësh që vendosen me urdhër nga lart?”, – shkruan ai.
Sipas tij, listat e kandidatëve janë hartuar në fshehtësi, pa u konsultuar me bazën, ndërsa shumë drejtues lokalë nuk kanë qenë në terren gjatë fushatës.
“Asnjë nga deputetët e listës së mbyllur apo ‘besnikët’ e partisë nuk u përball me bandat, patronazhistët dhe hajdutët e administratës. Ata ishin komandantë fushate, por jo në terren,” – thekson Hoti.
Në vijim të reagimit të tij, Hoti bën thirrje për mbajtje përgjegjësie dhe dorëheqje, duke përfshirë edhe kryetarin aktual të PD-së, Sali Berisha.
“Duhet të nisë urgjentisht një analizë e plotë e zgjedhjeve. Humbësit duhet të mbajnë përgjegjësi dhe të japin dorëheqje në bazë të statutit, duke filluar nga kryetari, z. Sali Berisha, e deri te drejtuesit e qarqeve,” – shprehet Hoti.
Ai thekson se statuti i partisë po shkelet hapur nga drejtuesit kryesorë dhe kërkon hapjen e PD-së ndaj figurave të reja, që sipas tij kanë treguar përkushtim dhe integritet në çdo proces zgjedhor.
Hoti kujton se zgjedhjet për Kryetarin e Bashkisë së Tiranës kanë treguar se shumë figura të afta janë të gatshme të kontribuojnë për rikthimin e PD-së në pushtet, por shpesh pa siglën e partisë, për shkak të mungesës së besimit tek drejtimi aktual.
“Kjo tregon se, për të ardhur në pushtet, na duhet më parë të rregullojmë veten,” – shkruan ai.
Në përfundim, Hoti apelon për transparencë, reflektim dhe përgjegjësi si rruga e vetme për ringritjen e Partisë Demokratike.
“Vetëm përmes transparencës, reflektimit dhe përgjegjësisë mund të fillojë ringritja e vërtetë e PD-së dhe rikthimi i besimit të qytetarëve te ne,” – përmbyll reagimin e tij Luan Hoti.
Discussion about this post