Zëdhënësja e PD Floriana Garo në një deklaratë për mediat u shpreh se reagimi i ditës së djeshme nga Gjykata e Lartë, pas deklaratave të kryetarit të Partisë Demokratike, Sali Berisha dhe të deputetit Salianji, ishte po aq flagrant sa edhe shkelja proceduriale me qëllim politike: një reagim sa për të thënë i cili nuk thoshte asgjë.
“Në asnjë rresht të komunikatës, as nuk cekej thelbi i arsyes, apo mosarsyes, se pse institucioni më i lartë gjyqësor në Republikë hedh një short të dytë kur ka hedhur ndërkohë një short të parë?’, shprehet Garo.
Fjala e zëdhënëses së PD Floriana Garo:
Gjykata e Lartë reagoi dje pas deklaratave të kryetarit të Partisë Demokratike, Sali Berisha, dhe të deputetit të burgosur politikisht, Ervin Salianji.
Reagimi ishte po aq flagrant sa edhe shkelja proceduriale me qëllim politike: një reagim sa për të thënë i cili nuk thoshte asgjë. Në asnjë rresht të komunikatës, as nuk cekej thelbi i arsyes, apo mosarsyes, se pse institucioni më i lartë gjyqësor në Republikë hedh një short të dytë kur ka hedhur ndërkohë një short të parë? Gjykata përdorte dje shprehje si ‘standard’, ‘integritet’ apo ‘rregulla’, ndërkohë që me vetë aktin e saj nuk respekton asnjë prej tyre, madje i shpërfill ato.
“Integriteti” i Gjykatës së Lartë është t’i tregojë publikut se, si u bë shorti i parë dhe, po ashtu se përse lindi nevoja për një short të dytë nëse kishte një ekzistues elektronik? Përse vallë? A mos për të zgjatur proçesin deri sa të përfundojë afati i regjistrimit të kandidatëve për deputetë?
Si ka mundësi që momentin e rëndësishëm të shortit, që u bëka nga KLGJ, që garanton paanësi, gjykata e zëvendesoka me një urdhër?
Ç’kuptim ka atëherê shorti?
Jo vetëm deputeti demokrat i burgosur politkisht, jo vetëm demokratët, por edhe publiku I gjerë kërkon të dijë se si një gjykatë që është mbi të tjerat dhe mbikqyr të tjerat I zhvendos rregullat dhe ligjet sipas dëshirës apo nevojës.
Këtë pret publiku, jo një komunikatë me gjuhë të drunjtë që nuk adreson problemin, por e fsheh aktin.
I burgosuri politik Salianji, duke shpresuar në integritetin profesional të secilit gjyqtar, dhe duke mos njohur apo pasur preferencë për asnjë prej tyre, si deputet I opozites dhe si qytetar ka si themel të shqetësimit manipulimin e procesit, vonesat me qellim.
Kushtetutës dhe ligjit i nënshtrohemi të gjithë si të barabartë! Bazuar në këto parime pyetja vlen sërish: Si u hodh shorti i parë, dhe pse Gjykata hedh short të dytë kur, sipas saj, nuk ka nevoje, meqe relatori i kerkeses për pezullim do te jetë dhe relatori i rekursit?
Discussion about this post