Ka nisur me debate mbledhja e Komisionit të Sigurisë ditën e sotme. Deputeti demokrat Ferdinand Xhaferri ka kërkuar që mbledhja të hapej me debatin sa i takon vdekjes së 32-vjeçarit Lear Kurti dhe jo me sulmet kibernetike, siç parashikon rendi i ditës, por kërkesa u hodh poshtë nga kryetari i komisionit Nasip Naço.
Të njëjtin qëndrim me deputetin socialist, ndau edhe drejtori i Policisë Muhamet Rrumbullaku, i cili deklaroi se sot do të fliste për sulmet kibernetike, pavarësisht skandalit që ka përfshirë radhët e policisë që prej vrasjes së të riut Lear Kurti.
Duke injoruar kërkesën e deputetëve demokratë për të folur për ngjarjen e rëndë, Rrumbullaku deklaroi se për vdekjen e Kurtit do të flasë pas 48 orësh, ndërsa shtoi se duhet të respektohet mundi i policisë së Shtetit, pavarësisht se këta të fundit akuzohen për vrasjen në mënyrë brutale të një të riu.
“Nuk i jam përgjigjur komisionit se kam qenë me shërbim në SHBA. Sa kërkojnë deputetët për ngjarjet e fundit jam i gatshëm të paraqitem brenda 48 orëve. Së dyti edhe për të ndjerin Rasha, në cilësinë e drejtorit të AMP, jam në gjendje te jap shpjegimet e detyruara. Do ju lutesha, që jo çdo gjë që mediatikisht shpërndahet për opinionin, janë të vërteta, reale dhe lidhen me hetimet e drejtësisë. Na respektoni mundin, djersen, gjakun që jep policia në shërbim të qytetarëve”, tha Rrumbullaku.
Discussion about this post