Drejtuesi politik i Partisë Demokratike për qarkun e Fierit, Enkelejd Alibeaj ka reaguar lidhur me protestën e naftëtarëve të rafinerisë së Ballashit, të cilët kërkojnë rivënien në funksion të uzinës, pasi pretendojnë se do të shitet për skrap. Në shkrimin e tij në “Facebook”, Alibeaj i drejton një pyetje kryeministrit Rama, ku i kërkon sqarim se në llogarinë e kujt do të shkojë skrapi i uzinës së Ballshit. Alibeaj gjithashtu thekson se i gjithë ky proces i shitjes së pasurisë kombëtare po bëhet fshehurazi, teksa punëtorët nuk janë paguar ende për rrogat që shteti iu detyrohet.
“Qeveria e skrapit ! Si deputet edhe për zonën e Ballshit, sot kam 1 pyetje publike për kryeministrin Edi Rama: Për llogari të kujt po shkon për skrap uzina e Ballshit dhe për llogari të kujt po çohen për ndjekje penale disa protestues? Punëtorët kanë denoncuar publikisht se një kompani periferike po demonton hajdutëshe, natën, rafinerinë e Ballshit, ku qeveria shqiptare është aksionere me 15%. Pra qeveria është dakord që pasuria kombëtare të shkojë për skrap, por po e bën këtë gjë në fshehtësi, në errësirë, pa u thënë asgjë mijëra njerëzve që deri dje jetonin me punën e uzinës dhe që akoma nuk kanë marrë 13 rrogat. “, shkruan ai.
Alibeaj nënvizon se pas kësaj afere korruptive fshihet Edi Rama dhe Belinda Balluku, ndërsa kërkon që kërcënimet ndaj protestuesve, të cilët sipas tij po denoncojnë këtë korrupsion të ndalohen.
“Shumë njerëz flasin se mbrapa demontimit për skrap të asetit strategjik të Shqipërisë është kryeoligarku që drejton sot shtetin bashke me Edi Ramën dhe Belinda Ballukun. Të dy kanë detyrimin të mos fshihen më, por të japin përgjigje çfarë pazari po bëhet me pasurinë kombëtare?! Partia Demokratike kërkon të ndalohen presionet ndaj punëtorëve që denoncojnë korrupsionin e Edi Ramës, Belinda Balkukut dhe Damian Gjiknurit me rafinerinë e Ballshit.”
Sipas Alibeajt, në 8 vite qeverisëse të Edi Ramës uzina është shfrytëzuar nga disa klientë, të cilët nuk kanë paguar taksa dhe kushtet për funksionimin në parametrat e duhura të rafinerisë nuk janë mundësuar.
“ Në 8 vjet, lejuan që disa klientë me radhë të shfrytëzojnë uzinën dhe punëtorët, të mos paguajnë taksa dhe të ikin me xhepat plot, duke e bërë akoma më të madhe gropën e vjedhjes.
Në 8 vjet, ndryshe nga premtimet e bëra, kjo qeveri nuk krijoi kushtet që rafineria të punojë me lëndë të parë nga nafta që prodhohet pak kilometra më larg sesa uzina. Strategjia për të ngarkuar këtë sektor me taksa ndihmon direkt kryeoligarkun e tij, për llogari të të cilit po çon për skrap Shqipërinë.”, shkruan Alibeaj.
Discussion about this post