Pasi PD i la jashtë çdo bashkëpunimi, deputetët e LSI i kanë dërguar një kërkesë zyrtarë kryetares së Kuvendit, Lindita Nikollës, për të qenë pjesë e Komisioneve Parlamentare.
Kështu, nënkryetari i LSI-së Petrit Vasili ka kërkuar që të jetë pjesë e Komisionit për Punën, Çështjet Sociale dhe Shëndetësisë. Deputetja Erisa Xhixho kërkon të jetë anëtarë e Komisionit për Çështjet Ligjore, Administratën Publikë dhe të Drejtat e Njeriut, ndërsa Agron Çela pjesë e Komisionit për Sigurinë Kombëtare.
Vetë Kryemadhi, e cila është kryetare e LSI-së nuk ka bërë kërkesë që të jetë pjesë e komisioneve parlamentare.
Sipas propozimeve të paraqitura nga grupet parlamentare, kryetar i komisionit për Ekonominë dhe Financat u miratua Eduard Shalsi, kryetare e komisionit për Integrimin Evropian Jorida Tabaku, kryetar i komisionit për Veprimtaritë Prodhuese, Tregtinë dhe Mjedisin u miratua Arben Pëllumbi, kryetare e komisionit për Punën, Çështjet Sociale dhe Shëndetësinë u miratua Albana Vokshi, kryetar i komisionit për Edukimin dhe Mjetet e Informimit Publik u miratua Agron Gjekmarkaj, kryetare e komisionit për Çështjet Ligjore, Administratën Publike dhe të Drejtat e Njeriut u miratua Klotilda Bushka, kryetar i komisionit për Sigurinë Kombëtare u miratua Nasip Naço dhe kryetare e komisionit për Politikën e Jashtme u miratua Mimi Kodheli.
