PD i përgjigjet akuzave të Berishës: Mashtrues kronik, ia pamë fytyrën e vërtetë me 8 janar

Partia Demokratike ka reaguar menjëherë pas deklaratave të ish-kryeministrit Sali Berisha nga Lezha, i cili tha se Basha bashkëpunoi me Ramën. PD e cilëson Berishën mashtrues kronik dhe thekson se demokratët dhe Shqiptarët e panë me 8 janar fytyrën e vërtetë të Sali Berishës. Në deklaratë thuhet se PD është shkëputur nga Berisha dhe po vazhdon rrugën drejt demokracisë dhe të ardhmes.

“I braktisur nga demokratët, me hallin qe sa vjen dhe i rritet, Sali Berisha vjen vërdallë nëpër Shqipëri duke treguar gënjeshtra. Demokratët dhe Shqiptarët e panë me 8 janar fytyrën e vërtetë të Sali Berishës, urdhëruesit të dhunës mbi PD. Demokratët dhe Shqiptarët nuk kanë kohë për të humbur me një mashtrues kronik. Demokratët kanë zgjedhur të ardhmen, shqiptarët duan dhe meritojnë një jetë më të mirë”, deklaron PD. Berisha tha sot se Basha dhe mbështetësit e tij po bëjnë plane me Ramën që të mbajnë peng pluralizmin dhe Partinë Demokratike, madje paralajmëroi protesta të tjera.