Partia Demokratike ka reaguar pas deklaratave të Presidentit Ilir Meta i cili dënoi dhunën e ushtruar gjatë protestës së 8 janarit. Kreu i Shtetit thotë se dhuna ishte e papranueshme nga të dyja palët. Për këtë, PD thotë se me këtë qëndrim, Meta nuk e fsheh aleancën me Berishën kundër selisë blu.
PD thotë se Berisha dhe Meta janë në një aleancë për të shkatërruar PD-në vetëm për faktin se ajo nuk bëhet bunker ku të strehohen për halle personale.
“Qëndrimi i sotëm i Ilir Metës, ku nuk fshehu aleancën me Sali Berishën kundër Partisë Demokratike dhe rolin e tij aktiv në sulmin ndaj selisë qendrore të Partisë Demokratike, është e vërteta tronditëse që po kuptojnë dita-ditës demokratët. Sali Berisha dhe Ilir Meta janë në një aleancë për të shkatërruar Partinë Demokratike, vetëm për faktin se ajo nuk bëhet bunker ku strehohen ata që kanë halle personale” – thuhet në deklaratën e PD-së.
Më tej në deklaratë, PD i bën thirrje Ilir Meta dhe njerëzit e tij të qëndrojnë larg selisë së Partisë Demokratike, pasi koha kur PD përdorej si mburojë nga Ilir Meta ka përfunduar në 9 Shtator
“Partia Demokratike ripërsërit kërkesën që Ilir Meta dhe njerëzit e tij të qëndrojnë larg selisë së Partisë Demokratike. Koha kur PD përdorej si mburojë nga Ilir Meta ka përfunduar në 9 Shtator, kur PD u distancua nga Sali Berisha.
Ndërhyrja e Presidentit të Republikës, njëlloj si Edi Rama, në një debat të brendshëm në Partinë Demokratike, tregon atë që kemi thënë që në nisje, që trekëndëshin Berisha-Rama-Meta e bashkon një hall i madh, por që nuk është as halli i Partisë Demokratike dhe as halli i qytetarëve shqiptarë” – thuhet në deklaratën e PD-së.
Discussion about this post