Partia Demokratike ka reaguar pasi ish-kryeministri Sali Berisha prezantoi sot në Sukth kandidatin Ardian Muka për bashkinë e Durrësit.
Selia blu shprehet se Berisha vijon të manipulojë demokratët, ndërsa ironizon duke thënë se kandidatët e shtëpisë së Ilirit, përfaqësojnë Ilir Metën dhe nuk kanë asnjë lidhje me Partinë Demokratike.
“Sali Berisha vazhdon të manipulojë demokratët. Kandidatët e shtëpisë së Ilirit sot përfaqësojnë Ilir Metën dhe nuk kanë asnjë lidhje me Partinë Demokratike. Disa njerëz nga Shtëpia e Ilirit e kanë të vështirë të heqin dorë nga e kaluara e tyre, por çdo votë për këtë shtëpi është votë për pazarin e radhës Meta-Rama. Shqiptarët e dinë shumë mirë që Partia Demokratike është një, dhe LSI një gjë tjetër. Sali Berisha dhe kandidatët e tij janë tashmë pjesë e LSI-së dhe ndonëse duket që u vjen turp nga anëtarësimi në këtë parti, ata nuk i lidh më asgjë me PD, sado mashtrojnë duke përdorur emrin dhe simbolet e saj. Demokratët e dinë se si Ilir Meta ka përdorur pushtetin dhe votat e tyre për pazarin me Edi Ramën ne 2013-ën. Sot po bën të njëjtën gjë”, shkruan PD.
Më herët, Berisha prezantoi kandidatin për kryetar të Bashkisë Durrës, Ardian Muka, ndërsa gjatë fjalës së tij, përsëriti vazhdimisht akuzat se Rama dhe Basha po bashkëpunojnë me njërit-tjetrin.
Discussion about this post