Sekretari i Përgjithshëm i PD, Flamur Noka, në emisionin “Çim Peka Live” në Syri Tv, tha se dosja e Xibrakës është një nga shenjat e inkriminimit total të Rilindjes që sapo kishte ardhur në pushtet.
Noka tha se Sali Berisha ishte i vetmi zë publik që denoncoi ngjarjen e Xibrakës, ndërsa Rilindja e akuzoi se po shpifte.
“Shteti i Rilindjes ishte i zhytur në krim, garanci më të madhe se përfshirja e vëllait të Kryeministrit nuk ka”, tha Noka.
Ai u shpreh se mesazhi i parë që iu tha shqiptarëve ishte që Rilindja erdhi në pushtet jo për të qeverisur, por për ta bërë Shqipërinë përshesh.
“Për të mbyllur këtë dosje u bë një pazar, që dy prokurorët e dosjes të bënin një devijim, të ndanin dosjen, me një person të paidentifikuar që ishte vëllai i Kryeministrit, Olsi Rama. Çfarë ndodhi? Një nga prokurorët e dosjes, Olsian Çela, duke ndihmuar Edi Ramën për të fshirë emrin e Olsit nga dosja, si shpërblim mori drejtimin e Prokurorisë së Përgjithshme, ndërsa Edvin Kondili, si njeriu më i dashur i Ramës dhe Veliajt, u bë Prokuror i SPAK. Madje kishin vendosur ta çonin në krye të SPAK, por historia lëvizi”, tha Noka.
Noka tha se Neritan Nallbati, drejtor i Policisë së Elbasanit në atë kohë, me këmbënguljen e Saimir Tahirit, ministër i Brendshëm në atë kohë, kanë zhdukur emrin e Olsi Ramës nga dosja e Xibrakës dhe kanë thënë “person i paidentifikuar”.
Akuza të ngjashme ndaj prokurorëve hodhi edhe kreu i grupit parlamentar të PD-së, Gazment Bardhi, i ftuar në emisionin “Opinion”.
Bardhi tha se me votën e Edi Ramës në Kuvend, Olsian Çela mori postin e Prokurorit të Përgjithshëm, ndërsa Edvin Kondili mbështetej nga mazhoranca për t’u bërë kreu i SPAK në garën me Altin Dumanin.
“Prokurorët e dosjes së Xibrakës që kishin për detyrë të hetonin këtë personin 45-vjeçar, njëri me votë të Edi Ramës është bërë Prokuror i Përgjithshëm i Republikës së Shqipërisë dhe prokurori tjetër është mbështetur në një garë ku Rama hyri në luftë me Ambasadën e SHBA-së për ta bërë të drejtor të SPAK. E vërtëeta është që të gjithë përfaqësuesit që ndodheshin atje me votë të Edi Ramës, votuan për Edvin Kondilin”, tha Bardhi.
Discussion about this post