Komisioni i Rithemelimit i dalë nga Kuvendi i Berishës ka reaguar pasi PD-ja zyrtare denoncoi në SPAK pesë ish-funksionarë të lartë të saj, duke thënë se kanë falsifikuar vulën dhe simbolet e PD në Kuvendin e së shtunës.
Ish-kryeministri Berisha, një ndër anëtarët e këtij komisioni shkruan në Facebook se ky veprim tregon që Basha ndihet i dëshpëruar dhe lidershipi i PD ka prekur fundin.
“Opozita nuk është as vulë as bravë! I tmerruar nga vendimi për shkarkimin me 4446 vota në Kuvendin e Partisë Demokratike datë 11.12.2021 pengu i Edi Ramës vendosi që me këshillën dhe mbështetjen e pengmarrësit të tij të padisë sot në SPAK vullnetin e mijëra demokratëve të shprehur masivisht kundër tij, si asnjëherë më parë në historinë e Partisë Demokratike! Ky veprim i dëshpëruar për të kërkuar ndihmë tek Edi Rama dhe falangat e tij në drejtësi provon dhe një herë faqe botës se arsyeja e vetme përse PD kalon prej vitesh nga humbja në humbje është pazari i peng-Bashës me Edi Ramën! Akte të tilla tregojnë se ish lidershipi i PD-së ka prekur fundin e tij politik dhe moral”, shkruan Berisha.
Sipas Berishës, Basha e ka humbur PD, ndërsa vijoi me akuza për bashkëpunim me kryeministrin Rama.
“Lulzim Basha ka humbur zgjedhjet, ka humbur qytetarët, ka humbur demokratët, ka humbur delegatët, ka humbur strukturat dhe vetë Partinë Demokratike, por i gënjen mendja se do mund të vazhdojë pazaret dhe marrëveshjet e fshehta me Edi Ramën me vula dhe brava! Është i pashpresë! Koha kur kauzat e qytetarëve dhe sakrificat e demokratëve blatoheshin si kurban në altarin e pazareve të tij me Edi Ramën ka marrë fund më dt 11.12.2021! Shqipëria nuk meriton dhe nuk do të ketë kurrë më një opozite dhe pluralizëm fasadë”, shkruan ndër të tjera.
Kjo deklaratë erdhi pak pasi Lulzim Basha njoftoi kallëzimin në SPAK ndaj Belind Këlliçit, Albana Vokshit, Edmond Spahos, Ivi Kasos dhe Ervin Minarollit.
Discussion about this post