Partia Demokratike vazhdon të përforcojë akuzat ndaj sekretarit të Përgjithshëm të PS, Damian Gjiknuri për afera me inceneratorët. Në një deklaratë për mediet, Sekretari i Përgjithshëm i PD-së, Gazment Bardhi ka akuzuar Gjiknurin se ka udhëtuar mbi 15 herë me ta jashtë Shqipërisë, ndërkohë që i gjithë aparati shtetëror ishte vendosur në gatishmëri të mafies së plehrave.
“Ditën e djeshme Partia Demokratike zbuloi një tjetër zgjatim të kësaj afere të pisët, nëpërmjet faktimit të lidhjeve të ngushta të Mirel Mërtirit dhe Klodian Zotos, bosëve të inceneratorëve, dhe Damian Gjiknurit, i cili ka udhëtuar mbi 15 herë me ta jashtë Shqipërisë, ndërkohë që i gjithë aparati shtetëror ishte vendosur në gatishmëri të mafies së plehrave.
Bardhi i bëri thirrje institucioneve të drejtësisë të veprojë për këto raste dhe të spastrojë politikanët e korruptuar. Sipas tij , PD është e gatshme të dorëzojë të gjitha provat e grumbulluara ndër vite me aferat korruptive të qeverisë.
“Ky konflikt i pastër interesi i shtohet numrit të madh të provave që Partia Demokratike ka grumbulluar vitet e fundit mbi këtë aferë që bën bashkë drejtuesit më të lartë të këtij pushteti të korruptuar, e sigurisht vet Edi Ramën, që ka promovuar dhe mbrojtur këto projekte që shkrumbojnë vetëm taksat e qytetarëve. Tani është radha e drejtësisë të thotë fjalën e saj mbi këtë aferë 400 milionshe, që tregon edhe njëherë urgjencën që ka Shqipëria të pastrohet nga politikanët e korruptuar dhe të largoi këtë regjim plaçkitësish”, tha ai.
PD ka deklaruar se çdo ditë do të nxjerrë fakte ku tregohen abuzimet që ka bërë kabineti qeveritarë i Ramës edhe gjatë pandemisë, ku shqiptarët po vuanin për ushqime dhe shërbime mjekësore.
