Në seancën e sotme plenare, deputetja e Partisë Demokratike, Albana Vokshi, kërkoi ngritjen e Komisionit Hetimor për zgjedhjet e 11 majit, duke deklaruar se refuzimi i kësaj nisme nga mazhoranca socialiste do të ishte një pranim indirekt i manipulimit zgjedhor.
“Nëse ju e refuzoni këtë komision, ju keni pranuar se keni vjedhur zgjedhjet,” – u shpreh Vokshi nga foltorja e Kuvendit.
Ajo theksoi se qëllimi i ngritjes së komisionit është transparenca dhe nxjerrja e gjetjeve për t’u përdorur në përmirësimet e ardhshme ligjore dhe në procesin e reformës zgjedhore.
“Ne sot kërkojmë një komision hetimor jo për PD, por për Shqipërinë. Pa zgjedhje të lira nuk ka ekonomi, nuk ka drejtësi, nuk ka të ardhme. Ky komision është testi i vërtetë i demokracisë në Shqipëri,” – shtoi deputetja demokrate.
Mazhoranca socialiste nuk është shprehur ende për qëndrimin që do të mbajë ndaj kërkesës së opozitës për ngritjen e komisionit.
Discussion about this post