Partia Demokratike do të kërkojë përjashtimin e Ilir Rusmalit nga shqyrtimi i të gjitha kërkesave që ka bërë PD në Komisionin e Ankimimeve dhe Sanksioneve (KAS) për pavlefshmërinë e zgjedhjeve të 11 majit në qarqet e vendit.
Sipas PD-së, Rusmali, ka konflikt interesi dhe nuk garanton paanshmwrinw e procesit, ka votuar pak ditë më parë për të mos i dhënë PD-së procesverbalet e qendrave të votimit për Kukësin dhe ka përsëritur sjelljet e një njeriu pa etikë.
Në seancën e mesditës së sotme, ku po shqyrtohej ankesa e PD-së për shpalljen e pavlefshme të votimit në qarkun e Dibrës, gjithashtu Ilir Rusmali ka ofenduar përfaqësuesin ligjor të PD-së, Marash Logu. Shkak u bë një mosmarrëveshje për procedurën e hapjes së kutive me përfaqësuesin e PD, Logu.
Gjatë debatit, Rusmali është shprehur: “Ti je djalë i ri dhe gabon vazhdimisht. Ishte e qartë kërkesa ime. Fodullin mos e bëj në institucion.”
Ndërsa Marash Logu, menjëherë pas kësaj deklarate, ka reaguar duke kërkuar procedurialisht përjashtimin e Rusmalit nga shqyrtimi i të gjitha kërkesave të PD-së në KAS:
“Kërkoj procedurialisht që Rusmali të përjashtohet nga shqyrtimi i të gjithë kërkesave që ka bërë PD se nuk garanton paanshmëri në këtë proces. Ka dhe konflikt interesi. Në këtë moment t’i ndërpritet fjala e të mos përfshihet në procedurë. Këto fjalë ‘fodullëk’ t’i mbajë për vete, e kërko falje e ruaj etikën.”
Kërkesa për përjashtimin e Ilir Rusmalit pritet të dorëzohet zyrtarisht pranë KAS në orët në vijim.
Ndërkohë, Partia Demokratike kundërshtoi sot tabelat përfundimtare të rezultatit të zgjedhjeve për qarkun Dibër, duke kërkuar pavlefshmërinë e zgjedhjeve të zhvilluara më 11 maj.
Përfaqësuesi ligjor i PD-së, Marash Logu, paraqiti në KAS prova dhe fakte që sipas tij dëshmojnë se “shteti u shkri në një me partinë” dhe se “administrata dhe resurset shtetërore u përdorën për të blerë zgjedhjet në këtë qark”.
PD kërkon gjithashtu të administrohen të dhënat e kryqëzuara nga pajisja PAY dhe të dhënat nga DHL për shpërndarjen e votës së diasporës.
Discussion about this post