PD, në mbledhjen e sotme të Konferencës së Kryetarëve, ka kërkuar heqjen nga programi i punës së Kuvendit të projektligjit për Barazinë Gjinore, duke e konsideruar atë një nismë me ndjeshmëri të lartë publike dhe sociale.
Nënkryetari i PD, Luçiano Boçi, deklaroi se ligji në fjalë prek drejtpërdrejt vlerat tradicionale të familjes shqiptare dhe se miratimi i tij në formën aktuale do të ishte i nxituar dhe i njëanshëm.
“Ky ligj duhet të hiqet nga programi i punës së Kuvendit, pasi është një ligj me ndjeshmëri të lartë publike dhe që, në thelb, cenon familjen. Duhet t’i japim kohë debatit,” u shpreh Boçi.
Ai theksoi se ka një interes të madh nga grupe të ndryshme interesi, përfshirë organizata të shoqërisë civile dhe komunitetet fetare, të cilat sipas tij janë kundër përmbajtjes aktuale të ligjit dhe kërkojnë të përfshihen në konsultime publike më të gjera.
Edhe deputeti i Partisë së Lirisë, Tedi Blushi ka kërkuar nga Partia Socialiste që të tërheqin projektligjin për barazinë gjinore.
“Tërhiquni urgjentisht nga avancimi i axhendave sorosiane per shkatërrimin e vlerave te familjes. Kush eshte urgjenca per miratimin e këtij ligji?
Ka vetëm burre e grua dhe vetëm nene e baba. Hiqni dore nga marrëzitë e gjinive te tjera. Mos prekni termat nene dhe babe, burrë e grua. Kjo nisem godet ne ADN vlerat e familjes dhe kombit shqiptar. Dëgjoni thirrjen e Komuniteteve te nderuara fetare qe ne unison janë kundër draftit.
Pretendoni se jeni konsultuar me grupe interesi. Po a ka grup me te madh interesi se komunitetet fetare? Pretendoni se keni folur me eurodeputete. Me cilët? Me ata qe promovojnë axhendat e Soros? Sllovakia e miratoi me Kushtetute, ka vetëm dy gjini burrë e grua. Sllovakia a nuk është ne BE?
Nuk na kompleksoni me idenë qe kemi folur me eurodeputete se para se te jemi europiane ne jemi shqiptare. Ndalni urgjentisht axhendat antikombetare dhe antifamilje”, tha Blushi.
Discussion about this post