Në mbledhjen e Komisionit për Median dhe Mjetet e Informimit Publik, deputetja e PD, Ina Zhupa është shprehur kundër rritjes së buxhetit për RTSH-në.
Sipas Zhupës, kjo nuk duhet të ndodhë pasi sjell rritjen e tarifave për qytetarët, ndërsa theksoi se Këshilli i RTSH-së është jo legjitim pa përfaqësuesit e opozitës.
“Ju keni mungese legjitimiteti si Këshill Drejtues i RTSH sepse sot nuk keni përfaqësues të propozuar nga opozita dhe funksiononi si një organizëm i kontrolluar dhe i dirigjuar nga qeverisja. Kjo besoj se duhet të jetë zgjidhja e parë që duhet bërë sa më shpejt edhe nga ky Komision, pasi në këtë Komision kanë kaluar dy kandidatura në Komisionin e mëparshëm duke marrë dhe miratimin e këtij Komisioni dhe kanë shkuar në seancë për t’u votuar, z. Edmond Tullumani dhe z. Besnik Mustafaj dhe pastaj me pseudo opozitën dhe gjithë procedurën e letrave nën rrogoz që keni çuar në seancë plenare, janë hequr dhe është kapur dhe këshilli drejtues i Radio Televizionit Shqiptar. Jo se është risi siç janë kapur gjitha institucionet e tjera por kjo duhet të rregullohet sa më shpejt në shërbim të publikut pasi është një televizion publik dhe paguhet nga publiku dhe që duhet t’i shërbej gjithë publikut”, tha Zhupa.
Referuar raporteve nga Kontrolli i Lartë i Shtetit, dhe fakti që ish-drejtori i RTSH, Thoma Gëllçi u arrestua për korrupsion, Zhupa tha se me abuzimet që bëjnë duhet të ishin në burg.
“Tani kthehemi në çështjen kryesore: Si i menaxhoni ju paratë dhe pse doni ju para të tjera nga taksapaguesit? Për këtë unë do t’i referohem Kontrollit të Lartë të Shtetit dhe do të ju them që ju sot keni në burg ish-drejtorin dhe disa zyrtar të RTSH por në atë që bëni ju në RTSH, ju duhet të kishit mbushur qelitë e burgut 313 me abuzimet që bëni me paratë e shqiptarëve”, u shpreh deputetja.
Sipas saj, hetimi i SPAK nuk duhet të përqendrohet vetëm tek rasti i Thoma Gëllçit, por të shtrihet më tej e të vendosen përpara përgjegjësisë ligjore dhe të tjerë.
Discussion about this post