Partia Demokratike e drejtuar nga ish-Kryeministri Sali Berisha po përgatitet për protesta. Kjo të paktën bëhet e ditur nga Belind Këlliçi, ish-deputet i PD dhe anëtar i Kryesisë në këtë parti.
Këlliçi ka publikuar në rrjet foto nga një takim që është zhvilluar në selinë e demokratëve me deputetë dhe strukturat e PD-së në Tiranë.
“Strukturat e #PD në #Tiranë drejt mobilizimit masiv për protesta. Asnjë stepje! Aksioni opozitar do të vijë ndryshe”, shkruan Këlliçi në rrjetin social.
Duket se demokratët e drejtuar nga Berisha do të ndryshojnë strategjinë në atë që e quajnë si përballja me regjimin e Edi Ramës.
Prej më shumë se dy javësh lideri i kësaj partie, ish-Kryeministri Sali Berisha ndodhet në arrest shtëpie, pas vendimit të GJKKO-së, ndërsa SPAK po e heton lidhur me procedurat për privatizimin e ish-kompleksit Partizani. Berisha po hetohet bashkë me dhëndërrin e tij Jamarbër Malltezi.
Discussion about this post