Deputeti i Partisë Demokratike, Helidon Bushati, ka publikuar sot disa të dhëna ku tregohet s enë 8 vitet e fundit në Shqipëri nuk ka pasur përmirësim të furnizimit me ujë. Përmes një postimi në Facebook ai shprehet se, në 8 vite qeveria ka rritur kosto që duhet të paguajnë qytetarët, por në krahasim më 2013 shërbimi është më keq.
“Miliarda të shpërdoruara, të vërtetën e ujit e tregojnë rubinetet. Sipas propagandës së rilindjes është bërë për ujësjellësit në këto 8 vite, më shumë se gjithë qeveritë e marra bashkë. Të vërtetën e tregojnë rubinetet. Siç doli nga ngjarja dramatike në Krujë, ku qindra banorë u helmuan prej investimit elektoral të përuruar nga vetë Kryeministri. Të dhënat tregojnë se në 8 vite kemi pasur kthim mbrapa. Në krahasim me 2013 mbulimi i furnizimit me ujë është më i ulët. Mbulimi i kostos totale dhe operative, më i ulët”, shkruan ai.
Sakaq, ai vë në dukje se edhe cilësia e stafit përgjegjës për ujësjellësit është shumë keq, ndërsa këto të fundit abuzojnë me fondin dhe rrisni borxhet. Sipas tij, kjo katastrofë krijohet për shkak se qeveria punëson në Administratë militantët e saj.
“Efiçensa e stafit, më e ulët, edhe pse është rritur numri i të punësuarve kryesisht me militantë, patronazhistë, apo gazetarë të pushtetit. Ndërkohë që arkëtimet janë rritur, shqiptarëve u janë marrë më shumë para çdo muaj! Borxhet e ujësjellësve ndaj OSHEE janë shtuar, janë debitorët më të mëdhenj! Janë investuar rreth 1.2 mld euro në 8 vite dhe rezultati është ky; nga 11.5 orë furnizim në 2013, në 13.8 orë në 2020. Miliadra për 2 orë më shumë ujë. Pra më shumë para të marra nga xhepi i shqiptarëve, më shumë para të hedhura për investime, dhe kriza e ujit është thelluar”, shkruan ai. Ndërsa i kërkon qeverisë të jap shpjegime se ku shkojnë paratë e alokuara për ujësjellësit.
