Partia Demokratike ka vazhduar denoncimin e saj për një “aferë” që sipas PD, “kërcënon sigurinë kombëtare”. Denonimi lidhet me kompaninë shtetërore KAYO, të drejtuar nga ish-drejtori i Policisë, Ardi Veliu, dhe me projektin e prodhimit të armëve dhe furnizimit të uniformave.
Në një deklaratë për mediat, Klevi Balliu akuzoi qeverinë se po krijon kompani me procedura të dyshimta, të cilat nuk plotësojnë as kriteret e vendosura nga vetë ajo. Ai vuri në fokus kompaninë Guna Tactical, në të cilën KAYO zotëron 51% të aksioneve, ndërsa kompania MSSC e Emiljano Dushës zotëron 49%.
Sipas Balliut, kjo kompani, e krijuar me një kapital fillestar qesharak prej vetëm 35,000 eurosh, ka marrë si objektiv furnizimin e uniformave për të gjitha strukturat e sigurisë së vendit, përfshirë Forcat e Armatosura, Policinë e Shtetit dhe agjencitë e emergjencave.
Balliu theksoi se kjo është bërë e mundur përmes një Vendimi të Këshillit të Ministrave (VKM) të firmosur nga zëvendëskryeministrja Belinda Balluku, por që, sipas PD-së, është shkelur në mënyrë flagrante. Balliu shtroi disa pyetje kyçe: Si mundet një kompani me 35,000 euro kapital të punësojë 400 punonjës dhe të investojë 15 milionë euro brenda tre vjetësh, siç kërkohet nga VKM-ja?
Përveç shkeljeve të kritereve, Balliu akuzoi KAYO-n se po uzurpon pronat publike, duke përmendur si shembull ndërhyrjen e saj për të marrë me forcë ambientet e televizionit News24. Ai e quajti këtë një provë të qartë të “korrupsionit të strukturuar”, që synon të pasurojë një grup të vogël individësh të lidhur me kryeministrin Edi Rama, duke dëmtuar sigurinë kombëtare.
Në fund, Partia Demokratike i bëri thirrje institucioneve të drejtësisë që të hetojnë këtë aferë dhe të ndalojnë këtë projekt. Balliu shtoi se PD-ja do të vazhdojë denoncimin e kësaj çështjeje, edhe pse shprehu skepticizëm se drejtësia do të reagojë.
Discussion about this post