Lajmi i fundit që po qarkullon në media lidhur me shkarkimin e drejtorit të Përgjithshëm të Policisë së Shtetit, Ardi Veliu ka shkaktuar reagimet e para nga radhët e opozitës.
Në Komisonin për Sigurinë Kombëtare, deputeti demokrat Luan Baçi pyeti ministrin e Brendshëm, Bledi çuçi në lidhje vërtetësinë e lajmit të shkarkimit. Ministri nuk e ka mohuar lajmin, por nisi të ironizonte duke thënë se “do e merrni vesh në momentin e duhur kur t’i mbarojë kandili”.
Debati:
Luan Baçi: Jemi shumë të interesuar, një lajm ka dalë në media se është shkarkuar drejtori i Policisë, Ardi Veliu. Kjo s’është në dorën tuaj xhanëm se e di kryeministri. Po a është e vërtetë?
Bledi çuçi: Nuk ka problem, s’ka asgjë. Ju do e merrni vesh në momentin e duhur, kur ti mbarojë kandili… (nis të qeshë me të madhe).
Salianji: Jemi komisioni i sigurisë apo…?
Gijotina.com ishte e para që raportoi në kohë reale shkarkimin e Ardi Velit, ndërsa janë disa emra potencialë që mund të zënë vendin e tij. Burime konfidenciale bëjnë me dije se ky vendim është marrë pak minuta më parë, ndërsa ende nuk dihen arsyet që kanë çuar në ndërmarrjen e këtij akti nga kryeministri Rama.
Ardi Veliu është kritikuar vazhdimisht dhe është përfshirë në skandale, por duket se vetëm tani është marrë vendimi për shkarkimin e tij nga detyra.
