Emërimin e Enkelejd Jotit në krye të Radio Televizionit Shqiptar, Partia Demokratike e konsideron si të paligjshëm.
Në një deklaratë për mediat, kryetari i komisionit të medias, Agron Gjekmarkaj, thotë se Këshilli drejtues nuk ka legjitimitet për të marrë vendime që përcaktojnë kush do të drejtojë median për të cilët shqiptarët paguajnë taksë.
Gjithashti ai thotë se për sa kohë opozita është e papërfaqësuar në këtë këshill dhe disa anëtarë të saj janë zgjedhur në parlament pa pëlqimin e PD, ne i konsiderojmë nul të gjitha vendimet e tij.
“Partia demokratike e konsideron të paligjshëm votimin për drejtorin e ri të radio televizionit shqiptar. Këshilli drejtues nuk ka legjitimitet për të marrë vendime që përcaktojnë kush do të drejtojë median, për te cilën shqiptarët, me apo pa parti, paguajnë taksë. Përsa kohë opozita është e papërfaqësuar në këtë këshill dhe disa anëtarë të saj janë zgjedhur në parlament pa pëlqimin e PD, ne i konsiderojmë nul të gjitha vendimet e tij. Ligji parashikon që këshilli drejtues të jetë i balancuar politikisht në mënyrë që të garantohet jo vetëm përfaqësimi, por edhe pavarësia, integriteti dhe autoriteti i këtij enti publik. Me emërimin e sotëm, Edi Rama e hodhi në erë këtë parim, duke u provuar edhe një herë si armik i ligjit dhe i pavarësisë së medias”.
Ditën e sotme Enkelejd Joti është zgjedhur Drejtor i Përgjithshëm i RTSH-së. Ai u zgjodh sot nga Këshilli Drejtues i Radio Televizionit Publik Shqiptar. Joti u zgjodh me votim të fshehtë të 9 anëtarëve të Këshillit Drejtues me tre të pestat e votave.
Discussion about this post