Partia Demokratike denoncoi sot se si kryetarja e Bashkisë së Durrësit kërkon të blejë vota me fondet e tërmetit, katër vite pas tragjedisë së rëndë.
“4 vite pasi la në çadra qytetarët e Durrësit, Emirjana Sako në prag fushate mbledh me urgjencë Këshillin Bashkiak për fondet e tërmetit,” tha kryetari i PD në Durrës, Dritan Burgija.
Deklarata:
Kanë kaluar katër vjet nga tërmeti i nëntorit 2019 por qytetarët e Durrësit vazhdojnë të jetojnë në çadra apo jashtë shtëpive të tyre.
Është e qartë për këdo që Shqipëria tanimë nuk është në kushtet e gjendjes së fatkeqësisë natyrore të tërmetit por qytetarët e prekur nga kjo fatkeqësi ndodhen në gjendjen e fatkeqësisë së shkaktuar nga keqqeverisja dhe abuzimi me pushtetin dhe fondet publike.
Qytetarët durrsakë vazhdojnë të përplasen dyerve të bashkisë sepse u duhen përsëri për votimet e radhës së kryebashkiakes.
Duke zvarritur procesin dhe fondet që i akordohen, kryebashkiakja e Durrësit pret zgjedhjet të miratoje grantet dhe listat e përfituesve duke zhvilluar mbledhje të Këshillit Bashkiak, të thirrura jashtë rradhe, në urgjencë, e duke shkelur Kodin Zgjedhor. Neni 91 paragrafi 4 ndalon shprehimisht ndarjen e fondeve publike në favor të zgjedhësve për një periudhe kohore prej 4 muaj para datës së zgjedhjeve.
Komisioni Shtetëror i Zgjedhjeve e ka gjobitur dhe në zgjedhjet e kaluara Emirjana Sakon për shkelje te tilla.
Sigurisht qelë halli i Sakos është i madh dhe ndonëse është përsëritëse në shkelje, nuk ndalet të përdorë të njëjtat mënyra të cilat janë denoncuar nga PD, shoqëria civile dhe janë gdhendur në raportin e OSBE/ ODIHR.
Qytetarët durrsakë janë të lodhur dhe mezi presin t’u normalizohet jeta.
Ata nuk do falin asnjë minutë të abuzimit të pushtetit me fatkeqësinë e tyre.
Kopjet e vogla të qeverisë së korrupsionit dhe skandaleve në 14 Maj do marrin përgjigjen e merituar.
Discussion about this post