Pas përplasjeve të shumta që patën që pas largimit të ish-kryeministrit, Sali Berisha, kryetari i Partisë Demokratike, Lulzim Basha shkarkon nga detyra e nënkryetarit të Komisionit të Sigurisë Flamur Nokën. PD njofton se deputetit të PD i është paralajmëruar edhe përjashtimi nga Grupi Parlamentar.
Në njoftimin e PD thuhet se arsyeja e këtij vendimi vjen pas shndërrimit të mbledhjes së Kryesisë së Grupit, në laborator të prodhimit të gënjeshtrave për të baltosur Kryetarin dhe Partinë Demokratike, me synim sajimin e diskutimeve apo qëndrimeve të pathëna dhe të paqena.
“Arsyeja e këtij vendimi është shndërrimi i mbledhjes së Kryesisë së Grupit në laborator të prodhimit të gënjeshtrave për të baltosur Kryetarin dhe Partinë Demokratike, duke sajuar diskutime apo qëndrime, të pathëna dhe të paqena. Këto shpifje dhe sajesa të herëpashershme dhe të përsëritura, dëmtojnë interesin e Partisë Demokratike dhe të demokratëve, duke shfokusuar vëmendjen e betejës së opozitës ndaj të vetmit kundërshtar që është armiku i Shqipërisë dhe shqiptarëve Edi Rama” – shkruhet në njoftimin e PD.
Kujtojmë që ditën e sotme gjatë mbledhjes së grupit parlamentar të PD, janë zhvilluar debate të forta mes Bashës dhe Nokës. Pas mbledhjes, në prononcimin për mediat Noka i ka kërkuar dorëheqjen kreut të Partisë Demokratike pas vendimit të gabuar në lidhje me heqjen e Berishës nga PD.
