Sekretari për Çështjet Ligjore dhe Zgjedhore në Partinë Demokratike, Ivi Kaso, ka reaguar përmes një deklarate për mediat lidhur me procesin e numërimit të votave të diasporës, duke e cilësuar atë si “të kompromentuar rëndë” dhe “jo legjitim”. Kaso lëshoi akuza të forta dhe bëri kërkesa specifike drejtuar Komisionit Qendror të Zgjedhjeve (KQZ).
Sipas Kasos, procesi i numërimit të votave të shqiptarëve jashtë vendit, teksa po shkon drejt fundit, po bëhet “gjithnjë e më shumë qesharak” dhe “qartazi u ka dalë nga duart atyre që projektuan këtë masakër elektorale”. Ai e cilësoi këtë proces si një “dështim katastrofik”, veçanërisht në Greqi, duke deklaruar se ky dështim “shpaloset përditë, me prova, para syve të qytetarëve”.
Për të mbështetur këto akuza, Kaso renditi disa nga parregullsitë në procesin e votimit të diasporës: raste të “panumërta… të zarfeve të mbërritur bosh pa fletë votimi”; zarfe “të shpërndarë nga patronazhistë”; numërimi, në mënyrë paradoksale, i “shumë më shume fletë votimi se sa zarfe të ardhura” në disa raste; zarfe “të mbërritur për në qarkun Durrës që përmbanin vota për Gjirokastrën”; dhe fakti që, sipas tij, KQZ “ende sot nuk di të na thotë së sa fletë votimi ka vulosur për diasporën”. Të gjitha këto raste u cilësuan prej tij si “çudira”.
Bazuar te këto konstatime, Kaso theksoi se ky proces i votës së diasporës është “tashmë i kompromentuar rëndë dhe jo legjitim”. Ai shtoi se ky proces “reflekton edhe atë që ka ndodhur brenda vendit, nëpërmjet të njëjtit mekanizëm”.
Përballë kësaj situate, Partia Demokratike, përmes Kasos, i bëri dy kërkesa zyrtare Komisionit Qendror të Zgjedhjeve. Së pari, kërkohet “kryerja e një auditi të plotë, me ekspertë të pavarur, për të gjitha hapat e këtij procesi të korruptuar në palcë”, duke filluar nga regjistrimi i zgjedhësve jashtë vendit, prodhimi i fletës së votimit, administrimi i fletëve të mbërritura, deri në daljen e rezultatit për çdo qark. Së dyti, i kërkohet KQZ-së “mosnxjerrjen e asnjë rezultati dhe mosmiratimin përfundimtar të asnjë tabele për diasporën derisa auditi i pavarur të dorëzojë konkluzionet e tij mbi procesin dhe të bëjë transparencë të plotë mbi votën e shqiptarëve”.
Në mbyllje të deklaratës, Kaso theksoi se procesi i votës së diasporës “tashmë ka rënë totalisht”. Ai shprehu keqardhjen që një iniciativë e Partisë Demokratike për t’u dhënë të drejtën e votës shqiptarëve jashtë Shqipërisë, e cila, sipas tij, u korruptua “në palcë dhe u disintegruar përpara syve të gjithë shqiptarëve, në saj të vullnetit të mbrapshtë të kësaj mazhorance”.
Discussion about this post