Partia Demokratike e Kosovës po kërkon shpalljen e datës së zgjedhjeve të përgjithshme të parakohshme. Kjo parti ka paralajmëruar bojkotin e Kuvendit të Kosovës dhe dorëheqjen e kryeministrit Albin Kurti.
Me këtë të fundit dhe me presidenten, Vjosa Osmani, kreu i PDK-së, Memli Krasniqi tha se nga sot do të shkëpusin çdo komunikim zyrtar, përveç në rastet kur do të diskutohet shpallja e datës së zgjedhjeve të përgjithshme.
Pas mbledhjes së këshillit drejtues, kreu i kësaj partie opozitare bëri të ditur se nuk do të votojnë në seanca plenare, e as në komisione. Ai nuk ka përjashtuar as protestat, derisa tha se çdo veprim demokratik duhet të merret parasysh.
Teksa theksoi se nuk do të komunikojnë zyrtarisht as me presidenten dhe kryeministrin, për të cilët tha se e kanë zbehur në nivele të pabesueshme raportin edhe me Shqipërinë.
Pas mbledhjes së këshillit drejtues të partisë, kreu i PDK-së, është pyetur edhe për dorëheqjen e kryetarëve të komunave në veri, ku tha se dorëheqja nuk është zgjidhje.
Në lidhje me mocionin për rrëzimin e qeverisë të propozuar nga kreu i AAK-së, Ramush Haradinaj, ai tha se nuk e ka parë dhe nuk e dinë se cilat janë nënshkrimet.
Për qëndrimet e PDK-së ndaj pushtetit, Krasniqi tha se nuk ka bashkërendim me partitë opozitare.
Kreu i PDK-së deklaroi se në dy muajt e fundit ka qenë në baza ditore në terren për të takuar qytetarët jashtë Prishtinës. Po ashtu, shtoi se ka takuar edhe pjesëtarë të shoqërisë civile, e sindikata ku tha se është bindur se nuk duhet të ndihmohen këto institucione.
Ditë më parë, Bashkimi Evropian ka njoftuar se masat ndëshkuese ndaj Kosovës kanë hyrë në fuqi më 28 qershor. Këto masa parashohin pezullimin e punës së organeve të MSA-së dhe programit të fondeve IPA dhe mos ftesa në ngjarje të nivelit të lartë./KosovaPress/
Discussion about this post