Pedagogët do të mblidhen sërish në protestë ditën e sotme për të njoftuar fillimin e një greve të mundshme, pasi qeveria nuk mori në konsideratë kërkesat e tyre. Ky ishte paralajmërimi i dhënë tre ditë më parë nga kreu i sindikatës së pedagogëve, Sandër Kovaçi, i cili foli për mediat gjatë bojkotit që u zhvillua përballë kampusit universitar.
Ai u shpreh se deri më tani nuk ka pasur asnjë reagim nga qeveria dhe ministria, ndaj janë duke menduar të përdorin variantin e fundit, atë të grevës.
“Duke qenë në këto kushte kur nuk ka pasur reagim deri tani, erdhëm në fazën e një bojkoti të deritanishëm, dhe tani i kemi dërguar kërkesë qeverisë, dhe të krijojë urën e komunikimit. Nuk duam të përdorim variantin e fundit, atë të grevës, por mund të përdoret për të ushtruar presionin e duhur mbi autoritetet për të reaguar në mënyrë konstruktive dhe ta kuptojnë rëndësinë e këtij bojkoti”, u shpreh Kovaçi, i cili bëri të ditur se sot në orën 11:00, do të zhvillohet një protestë kombëtare.
Sindikata e Pedagogëve dhe Sindikata e Punonjësve të Universiteteve prej dy javësh kanë bojkotuar mësimin në shenjë proteste për moszgjidhjen e kërkesave të tyre drejtuar ministrisë së Arsimit dhe qeverisë. Pedagogët kërkojnë nga ministria e Arsimit dhe qeveria rritjen me 30% të pagave këtë vit dhe 20% vitin që vjen ndërkohë që kërkojnë më shumë financime sa i përket kërkimeve shkencore. Kryeministri i është përgjigjur protestës së tyre dhe ka ofruar zgjidhjen e tij duke ofruar rritjen me 15% të pagave ku 8 % do mbulohej nga shteti dhe 7% nga universitetet, por kjo sipas pedagogëve është e pamjaftueshme.
Discussion about this post