Pedagogët dhe studentët kanë nisur marshimin në Tiranë, ndërsa gjatë protestës kanë hequr edhe karriget e vendosura para Kryeministrisë, mbi të cilat ishte shkruar “Dialog”.
Me thirrjet “Refuzojmë dialogun” dhe “Lironi studentët”, protestuesit kanë kundërshtuar ftesat e kryeministrit Edi Rama për bisedime, duke këmbëngulur në kërkesat e tyre.
Veprimi vjen pasi Rama ka përsëritur se është i gatshëm të komunikojë me protestuesit, ndërsa ka theksuar se nuk do të negociojë nën presionin e dhunës dhe akteve të shkatërrimit.
Ndërkohë, rreth 1300 pedagogë, të shoqëruasr edhe nga mijëra studentë janë mbledhur para Universitetit Politeknik të Tiranës dhe kanë nisur marshimin, duke kërkuar dorëheqjen e kryeministrit Edi Rama.
Gjatë protestës, ata janë shprehur se nuk kanë çfarë të dialogojnë me kreun e qeverisë, ndërsa kanë deklaruar se Parlamenti ka pushuar së funksionuari.
Profesor Enver Bytyçi ka deklaruar se lëvizja në mbështetje të studentëve do të vijojë me thirrjen për bojkot total të procesit mësimor, jo vetëm në universitete, por edhe në shkollat e mesme.
Sipas tij, një nga kushtet kryesore që i drejtohet qeverisë është ndalimi i dhunës ndaj protestuesve. Bytyçi paralajmëroi se, nëse situata nuk ndryshon, pedagogët do të vijojnë të jenë çdo ditë në shesh përkrah studentëve.
Ai paralajmeroi se pedagoget do te duhet ti mbeshtesin, madje edhe me greve urie.
“Lëvizja do të vijojë me një thirrje për bojkot total, jo vetëm në Universitet, por edhe në shkolla të mesme. Lëvizja do të vijojë duke mbështetur dhe duke vënë një kusht për qeverinë, duke ndalur dhunën. Nëse vazhdon dhuna, pedagogët do jenë në shesh cdo ditë dhe do ti mbështesim studentët ndoshta deri në një grevë urie. Ne e kemi obligim, të mbështesim fuqimisht studentët tanë. Ne jemi aty sepse studentët tanë janë aty. Ne duhet ti mbështesim fuqimisht. Ne ndihemi borxhli, sepse duhet ti kishim mbështetur që në 2018”, tha profesor Bytyci.
Discussion about this post