Në emisionin “Me Xhaxhiun” në Fax News ka qenë i ftuar pedagogu i njohur i Universitetit Bujqësor të Tiranës Lush Susaj, i cili foli për protestën dhe bojkotin e Sindikatës së Universiteteve. Pedagogët kanë kërkuar rritje pagash dhe fuqizim të kërkimit shkencor, ndërsa rritjen prej 7% të bërë nga qeveria e cilësojnë si tallëse dhe ofenduese për statusin e tyre. Ai u shpreh se nëse qeveria nuk reagon, pedagogët janë gati të hyjnë në grevë urie. Sipas Susaj, pedagogët nuk dalin dot në protestë pasi janë të kërcënuar dhe shantazhuar nga pushteti.
Pjesë nga intervista:
“Fatkeqësisht ne jemi shoqëri e mbyllur me traditë me shoqëri të mbyllur, jemi dhe njerëz hakmarrës. Kur u ngritën në protestë studentët jam lumturuar shumë sepse mendova se mori fund ky komunizëm. Janë hakmarrë që nga protesta e studentëve me të gjithë ata pedagogë që e mbështetën, dhe ka shantazhe pa fund duke qenë se në kafe shumë pedagog na thoshin ‘ju lumtë, por nuk dal dot sepse kam frikë’. Ka një nivel të lartë të shantazhit shtetëror edhe politik. Shantazhi mbi familjarët është i jashtëzakonshëm.
Ne protestojmë për universitetin dhe jo për rrogat, sepse në këtë mori problemesh që janë duhet filluar nga rrogat. Nuk ka kushte në universitete, në klasë kam pas 15 studentë dhe nuk kam gjetur një karrige dhe jam ulur në bankë me studentët aty nuk ka as shkumës, jo që projektor, video projektor, kompjuter s’bëhet fjalë. Pra, po protestojmë për një të mirë publike, por që të shpëtojmë këtë mirë publike duhet të fillojmë nga pagat që të kemi kohë të merremi me studentët. Për të nxjerr profesionistë na duhet të paktën një pagesë minimale.
Reagimi është shumë i vonë nga ana jonë, për shkak të zhvillimit të vonuar jemi këtu ku jemi. Sepse në ato kushte që janë universitet, janë skandaloze dhe po ne shkaktojmë shumë dëme duke mbajtur studentët 5 vjet dhe në fund ajo diplomë s’i duhet për asgjë.
Nëse nuk reagon qeveria dhe injoron sindikatën, qoftë edhe dy veta, ne do futemi në grevë urie, sepse e dimë për çfarë po reagojmë. Lutem që qeveria mos na çojë deri në atë gradë. Ne nuk kemi ndërmend më të heshtim nëse nuk reagojmë ne do shkojmë grevë urie, sepse e di për çfarë po shkoj. Unë po shkoj për universitetin dhe për atë pagë që është e një mijta e problemit, por për jetën dhe të ardhmen e çdo rinie universitare në këtë vend.”-u shpreh Susaj.
Discussion about this post