Pas vendimit të befasishëm të Ousmane Dembele për t’u larguar nga Barcelona, në klubin katalanas duket se nuk ka vend për “frikë” pasi në organikën e trajnerit Xavi Hernandez ka ende nga ata futbollistë që kërkojnë të mbeten gjithë jetën blaugranas.
Fjala është për Pedrin, talentin e mesfushës së Barçës, i cili në një intervistë të fundit thekson se duhet të ndodhin shumë gjëra në mënyrë që ai të largohet nga klubi spanjoll. Pedri shtoi se ëndërron të jetë kapiten, edhe pse e di mirë se për momentin është ende i ri për një përgjegjësi të tillë.
“Duhet të ndodhin shumë gjëra që të më detyrojnë mua të largohem nga Barcelona. E shoh si diçka të pamundur, Barça është klubi i ëndrrave të mia dhe dua të qëndroj këtu për shumë vite. Dua të jem kapiten, më thoni kush nuk do të jetë kapiteni i klubit që ai ëndërron kur është fëmijë? Megjithatë, e di se jam ende i ri për këtë përgjegjësi.
Gundogan? Është spektakolar. Ne këtë vit do të luftojmë për gjithçka. Sezonin e kaluar fituam kampionatin dhe SuperKupën, por zhgënjyem në Champions. Dhe prandaj, rikthimi protagonist në Champions është objektivi ynë kryesor”, u shpreh Pedri.
Discussion about this post