Pelegrinazhi në malin e Tomorit, një nga festat më të mëdha të komunitetit bektashian në Shqipëri, fillon ditën e nesërme deri më 25 gusht, dhe mijëra personat që do t’i drejtohen asaj zone kërkojnë një menaxhim të mirë nga ana e autoriteteve lokale dhe forcave të rendit.
Rruga e re për në Malin e Tomorit, pak a shumë nga Poliçani në teqenë e Kulmakut, u inaugurua një vit më parë. Në pelegrinazhin e kaluar, besimtarët dhe vizitorët e teqesë shprehën pakënaqësinë e tyre për gjerësinë e segmentit si dhe menaxhimin e trafikut.
Për orë të tëra mijëra automjete mbetën të bllokuara, ndikuar edhe nga numri i lartë i pelegrinëve. Në total segmenti rrugor është 23 km, dhe me asfaltimin e kryer shkurtohet distance kohore me 30 minuta.
Autoritet policore të qarkut Berat kanë hartuar një plan masash, që përfshin 185 efektivë, të cilët do të sigurojnë rendin, dhe kanë bërë publik e itineraret për të mbërritur në zonën e pelegrinazhit.
Itinerari për drejtuesit e mjeteve që shkojnë në drejtim të Malit Tomorr do të jetë:
Hyrje e qytetit të Beratit – Rrethrrotullimi i Kombinatit – Unaza e qytetit – Rrethrrotullimi Uznovë – Kryqëzimi Plirëz – Teqeja e Kulmakut.
Ndërkohë, itineraret për drejtuesit e mjeteve që kthehen nga Mali Tomorr do të jenë:
Teqeja e Kulmakut – Bargullaz – Pronovik – Poliçan – Uznovë – Berat (rruga kryesore Antipatrea) – Rrethrrotullimi i Kombinatit, ose itinerari alternativ Teqe e Kulmakut – Novaj – Bogovë – Poliçan – Uznovë – Berat (rruga kryesore Antipatrea) – Rrethrrotullimi i Kombinatit.
Drejtuesit e mjeteve dhe pelegrinët që vijnë nga qyteti i Çorovodës, këshillohet të përdorin aksin rrugor “Çorovodë – Gjerbës – Teqeja Kulmak” dhe kthim.
Autoritetet njoftojnë se do të ndalohet qëndrimi dhe pushimi i mjeteve në aksin e rrugës, si dhe nuk do të lejohet të qarkullojnë mjete të tonazhit të rëndë nga ora 06:00 – 24:00, për periudhën 18 – 25 gusht 2022, në disa akse rrugore si “Vlashuk Kuçovë – Berat”, ”Ura Kuçit – Dimal – Berat”, “Pobrat – Dimal – Berat”, ”Berat – Mali Tomorrit”, ”Berat – Çorovodë”, ”Çorovodë – Gjerbës – Mali Tomorrit”.
Discussion about this post