Ministri i Mbrojtjes, Niko Peleshi ka komentuar situatën e zjarreve gjatë verës në vend, ku dy persona në përpjekje për të shuar flakët që kishin pushtuar banesën e tyre, ndërruan jetë. Në një konferencë në Bazen Ajrore të Farkës, Peleshi shprehu vlerësimet për ushtarët, zjarrfikësit dhe pilotët që punuan në fikjen e zjarreve.
Një falënderim të veçantë, ministri pati për prefektin e Vlorës, Flamur Manaj, për të cilin tha se qëndroi me net të tëra pa gjumë pasi zjarri rrezikonte Parkun e Llogarasë. Kështu, ai evitoi të përmendë emrin e kryebashkiakut Dritan Leli, duke shtuar zërat për një përçarje të tij dhe PS-së.
“Më luftën për të mbrojtur së pari jetën dhe pasurinë e qytetarëve dhe padyshim mjedisin. Dy qytetarë humbën jetën në Gjirokastër dhe katër të tjerë u lënduan. Dëmet do të kishin qenë të pallogaritshme nëse nuk do të ishte puna e përkushtuar e forcave tona. Të japim vlerësimet e merituara për ata që spikatën. Sa herë që ka operacione të mëdha vlerësimet nuk mund të jenë asnjëherë 100% objektive. Do t’ju lutesha që ato vlerësime që do të shpërndahen sot ti marrin sikur janë për gjithësecilin. Jam i prekur nga devocioni i ushtarakëve, zjarrfikëseve dhe pilotëve. Prefekti i Vlorës më ka prekur kur e kam parë me net të tëra pa gjumë dhe të punojë si ushtarët. Shifrat janë mbi 3 mijë ha të prekura. Ky angazhim i madh ka bërë të shmangim më të keqen,” deklaroi ministri.
