Ndeshja miqësore mes Kosovës dhe Zvicrës ishte shumë e veçantë për yllin e Arsenalit, i cili ndaj përfaqësueses së vendit të tij luajti ndeshjen e 100-të me kombëtaren helvete.
Pas ndeshjes, Granit Xhaka pohoi se ky takim ishte plote emocione për të, ndërsa theksoi se Kosova është bërë një ekip i madh.
Ndër të tjera, mesfushori shprehet se nuk ka pasur mundësi ndërrimi të kombëtares, pas pranimit të Dardanëve në UEFA dhe FIFA, teksa duket si një farë pendimi për futbollistin 29-vjeçar .
“Nuk ka pasur shanse që ndeshja ime e 100-të me Zvicrën të ishte ndryshe, pasi luajta kundër Kosovës, vendlindjes sime që e dua shumë. Ishte një ndeshje e mirë, ku dy ekipet treguam lojë të mirë. Por nuk shfaqëm më të mirën, si Kosova ashtu edhe ne. Kosova është një ekip shumë i mirë, me lojtarë individual cilësorë. Po forcohet si ekip me lojtarë të rinj dhe besoj se ka një të ardhme të ndritur. Nuk mendoj se vetëm ne kishim emocione, por edhe lojtarët e Kosovës që janë rritur në Zvicër. Në përgjithësi ishte një ndeshje emocionale për të gjithë. Kam vendosur herët të luaj për Zvicrën dhe nuk kam pasur shanse më vonë ta ndërrojë vendimin”, ka thënë Xhaka.
Discussion about this post